A Coruña.- A portavoz nacional do BNG e candidata á presidencia da Xunta nas eleccións do próximo 18 de febreiro, Ana Pontón, propuxo este luns en Mazaricos (A Coruña) un programa de compra pública de produtos galegos para os comedores escolares, de hospitais, residencias de maiores e menores e centros dependentes da administración autonómica.

A medida, baixo o título Do rural á mesa, ten por obxecto «apoiar aos produtores e produtoras e mellorar a calidade da alimentación nos centros» da Xunta, dixo Pontón.

«Trátase de que as administracións compren produto galego fresco e de calidade para que chegue a todos os comedores do ámbito público» explicou a candidata.

Pontón visitou unha explotación gandeira de Mazaricos cuxa titular é unha muller, unha situación, que, lamentou, non sucede en toda Galicia con outras agricultoras e gandeiras «que fan o mesmo traballo [que os homes] e non teñen ese recoñecemento».

Igualdade para as mulleres agricultoras

Nese sentido, a líder do BNG prometeu «traballar na igualdade das mulleres no medio rural» se chega á presidencia do Goberno autonómico, non só no que se refire á cotitulariedade das granxas senón tamén en aspectos como a dotación de recursos para a conciliación e a discriminación positiva cara ás zona rurais.

Ademais, Pontón anunciou que porá en marcha un «ticket rural» de 15.000 euros para impulsar proxectos innovadores no sector agrogandeiro; un cheque para a compra de alimentos para que as familias con rendas baixas teñan acceso a produtos frescos de calidade, e a extensión do programa de comedor en casa a todas as persoas dependentes que viven en zonas rurais.

Na convención nacional do BNG o pasado domingo en Santiago, a candidata nacionalista apelou a «unha mobilización masiva» nas eleccións autonómicas «para derrotar ao PP cunha vitoria histórica e poñer en marcha o mellor Goberno de todos os tempos» en Galicia.