Os Franco recollen bens da Casa Cornide despois de que o Concello iniciase accións legais para recuperala

Unha furgoneta que almacenaba mobiliario saltou as alarmas este martes na Cidade Vella da Coruña. Ocorre días despois de que o Goberno local mostrase a súa disposición a preitear coa familia do ditador para devolver ao patrimonio público a Casa Cornide.

Os Franco temen que a Casa Cornide se converta noutro Pazo de Meirás. Uns veciños da Coruña viron este martes como unhas persoas recollían bens do palacete e gardábanos nunha furgoneta para trasladalos a outra localización que se descoñece. O edificio barroco está actualmente en venda e en trámite para declararse Ben de Interese Cultural (BIC) pola Xunta de Galicia. O Concello da Coruña comezou hai uns días o proceso para reclamar por vía legal a titularidade pública do inmoble.

A diferenza do Pazo de Meirás, descoñécese a cantidade de fortunas que pode gardar a Casa Cornide ao non existir un inventario, e por iso os herdeiros do ditador pretenden salvagardar os bens que os historiadores cualificaron como o «museo imaxinario» de Carmen Polo, xa que se descoñece de onde extraeu toda a cantidade de elementos que ennobrecen o interior do edificio. Algúns poden provir do palacio do Pardo. Este martes uns veciños da Coruña viron como unhas persoas gardaban nun vehículo de mudanza unhas cadeiras «antigas». No informe histórico-artístico que o Goberno municipal encargou a Alfredo Vigo Trasancos sobre a Casa Cornide sinálanse bens como «arañas de cristal, cadeiras nobres de madeira, consolas e cómodas de diferentes estilos, espellos, lenzos con paisaxes antigas, reloxos, alfombras, algún retrato de gran tamaño e obxectos ricos de porcelana, así como un fondo bibliográfico de libros antigos». De feito, por este edificio tamén pasaron as estatuas do Pórtico da Gloria.

[Puedes seguir leyendo este artículo en castellano aquí]

Días despois de que o Estado recuperase as chaves do Pazo de Meirás facíase pública a noticia de que a alcaldesa socialista da Coruña, Inés Rey, iniciaba un preito coa Familia Franco para defender a natureza pública doutro palacio do ditador. O Goberno municipal baséase nuns informes históricos, artísticos e xurídicos, este último encargado á Universidade da Coruña (UDC). Nel os investigadores demostran as ilegalidades dos diferentes procesos de permuta, poxa e venda da Casa Cornide, un sistema perfectamente articulado para que o palacio acabase en mans de Carmen Polo e Martínez Valdés por 25.000 pesetas.

O BNG da Coruña, que foi o partido en avisar da presenza da furgoneta na Casa Cornide, solicitou un inventario do edificio barroco para evitar «calquera tentativa de saqueo». «Os Franco queren evitar que pase o que en Meirás: que se faga un inventario do que contén a Casa Cornide para evitar que o leven de alí».


Este artigo publicouse orixinariamente en castelán en Público como parte dun acordo de colaboración con este periódico. Aquí podes atopar máis artigos de Público en Luzes.

 

cool good eh love2 cute confused notgood numb disgusting fail