No episodio desta semana das Womansplainers introducimos o tema do «natural» desde varias perspectivas. Caseiro, artesán, sen químicos…Durante anos a publicidade ten mostrado estas cartas como reclamo para facernos crer que a nosa maneira de consumir vai ser máis ambientalista ou até menos prexudicial para a saúde. Será que todo o non procesado é necesariamente bo?

Marilar Aleixandre é bióloga, investigadora, escritora e membro da RAG. Con ela do noso lado puidemos facer unha revisión histórica sobre se ás mulleres lles son reservados unha serie de deberes naturais ou se a natureza de homes e mulleres é tan diversa que pode definir ou, mellor dito, distinguir, as súas capacidades e aptitudes. Os coidados, o histerismo, a reprodución, etc, son colocados no punto de mira neste programa.

Existe unha maneira natural de criar? se así fose, estaríamos tamén a afirmar que debe haber un modo artificial de facelo. O calificativo «natural» non nos abandona e está ao redor de moitos asuntos, como os partos. Observamos que cada vez existen máis reflexións sobre a adecuación das prácticas hospitalarias e que hai quen opte por outras alternativas por temor á violencia obstétrica ou ao exceso de medicalización.

Os ácaros, as bacterias ou os xermes son tamén elementos naturais con que convivir, pero chegou a pandemia e isto provocou un abuso de desinfección. Aínda nos falta distancia temporal para poder ver as consecuencias.

Nesta semana as mulleres explicamos cousas con toda naturalidade. Esperámosvos.