A Coruña.- Gonzalo Pérez Jácome obtivo onte unha contundente vitoria en Ourense que non só afianza as súas posibilidades de repetir catro anos máis na Alcaldía da cidade. A pesar das numerosas informacións que apuntan a serias irregularidades na súa xestión, a súa Democracia Ourensá foi a forza máis votada co 34% dos sufraxios e dez dos 27 concelleiros da corporación. É dicir, tres máis dos que obtivo en 2019 e por enriba dos resultados de PP (7), PSOE (6) e BNG (4).
Non só iso. Grazas a ese triunfo, Democracia Ourensana conseguiu tres escanos na Deputación Provincial, un máis dos que tiña ata o de agora, o que converte a Jácome na única posibilidade para que o PP de Manuel Baltar poida conservar a presidencia da institución. A dereita gobérnaa desde 1979 e construíu durante décadas sobre ela a rede clientelar que sustenta o poder dos populares na provincia e a súa capacidade de presión e influencia sobe o partido a nivel autonómico e estatal, pero agora quedouse con 12 asentos nela –o PSOE ten sete e o BNG, como DO, outros tres-.
Jácome estaba eufórico o domingo tras coñecer os resultados: «Ourense non só falou esta noite, Ourense gritou». «É un triunfo absolutamente histórico», dixo, o do «único partido independente que manda nunha cidade [capital] de provincia». O alcalde sinalou que os seus tres escanos na Deputación representan unha vitoria tamén «histórica».
Baltar será xulgado este mércores
O Partido Popular enfróntase agora a unha seria disxuntiva. Baltar será xulgado este mércores en Póboa de Sanabria (Zamora) e probablemente condenado por un delito contra a seguridade viaria por circular a 215 km/h conducindo o coche oficial da Deputación, e non é descartable que sigan aparecendo noticias sobre máis multas e irregularidades no uso do parque móbil do organismo e sobre as comisións ilegais e o financiamento irregular das que o acusa a oposición.
A erosión que xa producen eses feitos na imaxe do PP e do propio Feijóo agravaríase coa repetición das fotos dun Baltar condenado e dun Jácome investigado por corrupción repartíndose o poder co visto e prace do partido e do seu presidente, e ese quizá sexa un risco que non estean dispostos a asumir en plena precampaña das eleccións xerais. O certo é que a Jácome lle saíu tan ben a xogada nas municipais que mesmo podería repetir mandato co voto en contra de toda a oposición, xa que lle bastaría con que esta non acorde un candidato alternativo.
O líder de Democracia Ourensana, ademais, está agora en posición mesmo de ameazar a posición do PP en Galicia. Se se repetisen nuns comicios autonómicos os resultados do pasado domingo e DO se presentara a eles, Jácome quitaríalle un escano ao PP no Parlamento de Galicia e estaría a menos de 1.200 votos de arrebatarlle o segundo. Máis que suficiente, quizáis, para converterse na chave para a gobernabilidade da Xunta. O acordo ao que o alcalde chegou con Feijóo e Baltar en 2019 tamén incluía á promesa de non presentarse ás autonómicas de 2020.
Pacto improbable co PSOE e o BNG
Para o PP, tanto pactar con Jácome como non facelo é un perigo. O candidato do PP á Alcaldía de Ourense, Manuel Cabezas, inimigo íntimo de Baltar, xurou durante a campaña das municipais que «xamais» o faría, pero non se arriscou a aclarar que falaba en nome do PP. É dicir, se o que quería expresar en realidade era que se houbese que volver pactar, o seu partido podería facelo aínda que el se retiraría, como no seu día fixo o tamén exalcalde Jesús Vázquez. En calquera caso, para impedir que Jácome volva ser alcalde o PP tería que pactar co BNG e co PSOE un nome alternativo, algo ao que estes non están dispostos e moito menos se o acordo non inclúe en letras destacadas a saída definitiva de Baltar.
Para substituír a este, segundo confirmaron fontes do PP, o candidato de Alberto Núñez Feijóo e de Alfonso Rueda é Luís Menor, alcalde de Pereiro de Aguiar e cabeza da única corrente do partido que ata o de agora foi capaz de levarlle contraria ao actual presidente. Menor obtivo un excelente resultado o domingo facéndose con dez das 13 concellerías da corporación, pero esa non é artillería suficiente para que puidese enfrontar con éxito unha hipotética batalla contra Baltar sen o apoio de BNG e PSOE, que en ningún caso parecen dispostos a socorrer ao PP.
Fontes do BNG descartaron que os nacionalistas vaian prestarse a esa xogada e apoiar pacto algún cos populares. «Non imos ser os seus parvos útiles para que poidan resolver dous problemas, Baltar e Jácome, que crearon eles mesmos», advirten. E iso eleva as opcións de que o portavoz socialista na Deputación e gañador das eleccións de 2019, Rafael Rodríguez Villarino, poida facerse coa presidencia da institución.
