A Coruña.- A Xunta de Galicia estuda atrasar a idade de xubilación dos médicos do Servizo Galego de Saúde (Sergas) para cubrir a avalancha de xubilacións previstas no próximos cinco anos, segundo declaracións da directora xeral de Recursos Humanos do Sergas, Ana Comesaña, á cadea SER.

A idea do Executivo que preside Alfonso Rueda é permitir que os profesionais poidan estender a súa vida laboral ata os 72 anos, fronte aos 70 da actualidade. No próximos cinco anos está previsto que máis de 2.000 médicos de Galicia accedan á idade de xubilación.

Esa medida uniríase ao ofrecemento de contratos de tres anos aos médicos internos e residentes (MIR), á flexibilización das normas de incompatibilidades e a unha mellora das condicións salariais e laborais, que a Xunta aínda non concretou e coa que pretende frear as mobilizacións que anunciou o colectivo.

Os médicos levan anos denunciando a situación de precariedade no sistema de saúde, e o sindicato maioritario no colectivo, O’mega, iniciou o pasado luns unha rolda de asembleas nos hospitais previas á convocatoria dunha folga.

De convocarse os paros, coincidirían con toda probabilidade coas protestas anunciadas polas plataformas de defensa da sanidade pública, que se manifestarán en Santiago o próximo día 12 co apoio de partidos de oposición, sindicatos e organizacións profesionais. A Xunta reaccionou convocando este martes aos portavoces sindicais a unha reunión en Santiago.

O pasado novembro, os ministros de Sanidade, Carolina Darias, e de Seguridade Social e Migracións, José Luis Escrivá, anunciaron que o Goberno estudaba permitir excepcionalmente durante tres anos que os médicos de atención primaria poidan continuar exercendo despois dos 65 anos e percibindo o 75% das súas pensións, fronte ao 50% da actualidade, como medida para paliar a falta de profesionais na sanidade pública.

«Estamos a ter reunións para modificar o estatuto marco [do persoal estatutario dos servizos públicos de saúde] para que se elimine a idade de xubilación aos setenta e póidase permitir ata os 72, como sucede por exemplo na xudicatura (…) e que entren máis profesionais a través do MIR», asegurou a directora xeral de Recursos Humanos do Sergas.

Ese departamento indicou a Luzes-Público que, ademais desa medida, traballa noutras liñas «para manter, reter e convencer ao persoal sanitario». «Mellorando as súas retribucións»; incrementando o prezo pago por hora nos puntos de atención continuada (PAC) «a partir da dedicación de 160 horas» e pedindo unha ampliación de prazas MIR, que se some aos contratos de tres anos para os médicos que terminen esa formación.