A Coruña.- As bases de Podemos en Galicia rexeitaron cun 62,36% dos votos ir con Sumar ás eleccións galegas do próximo 18 de febreiro, segundo o resultado da consulta vinculante celebrada polo partido entre o pasado xoves e o venres .

Segundo confirmaron a Luzes-Público fontes da formación, a militancia tamén elixiu a Isabel Faraldo como candidata á presidencia da Xunta, co 54,5% dos apoios fronte ao 45,5% que obtivo Charo Varela.

A decisión supón que a esquerda alternativa, que en 2016 logrou ir unida aos comicios autonómicos para converterse na segunda forza do país, concorrerá polo menos con dúas listas, a de Sumar e a de Podemos. A elas poderían sumarse outras dúas.

Os nacionalistas de Anova, que rexeitaron hai unhas semanas a oferta de ir con Sumar co seu portavoz nacional, Martiño Noriega, encabezando a candidatura, aseguraron que estarán nas eleccións, aínda que aínda non confirmaron se o farán por conta propia ou buscando un espazo no BNG.

Antes da consulta de Podemos, Esquerda Unida aceptara un borrador de preacordo coa formación de Díaz baixo a suposición de que na coalición tamén estaría Podemos. A formación que lidera Eva Solla aínda non se pronunciou sobre o novo escenario.

Sumar lamenta a decisión

Fontes de Sumar Galicia, que o pasado mércores presentou á súa candidata, Marta Lois, anunciando que o acordo con Podemos xa era unha realidade, lamentaron a decisión das bases de Podemos. «Nós fixemos o que tiñamos que facer», sinalan.

Ao peche deste artigo, a dirección de Podemos que lidera Borja San Ramón atopábase analizando os resultados da consulta e preparando un comunicado.

Na consulta participaron máis de 2.500 persoas, aínda que nas primarias para a elección de candidato só votaron 1.918. É dicir, que a case un 25% da militancia activa o único que lle preocupaba era expresar o seu rexeitamento para Sumar, sen importarlle quen fose a candidata de Podemos.

Nese sentido, fontes da formación violeta trasladarona súa crenza en que a irrupción de Pablo Iglesias no proceso o pasado xoves puido ter un peso relevante na decisión das bases.

Iglesias pide o voto para o BNG

Ese día, o exlíder de Podemos pronunciouse a través de Canal Red, o medio que dirixe, e as súas redes sociais, non só animando á militancia galega a que rexeitase a coalición con Sumar, senón a que pedise o voto para o BNG.

A executiva estatal de Podemos que encabeza Ione Belarra dera mans libres á de Galicia para que manexase ao seu criterio as negociacións con Sumar, pero a mensaxe de Iglesias non gustou nalgún sector de militantes.

Fontes do partido considérana unha inxerencia destinada exclusivamente a debilitar a Sumar, e que non tivo en conta que boa parte das posibilidades de que Alfonso Rueda non obteña maioría absoluta en Galicia pasan, precisamente, por unha alianza sólida da esquerda alternativa.

Fronte á posición de Iglesias, o polítólogo e cofundador de Podemos Juan Carlos Monedero, mostrouse en cambio a favor de que Sumar e Podemos fosen unidas ás autonómicas. Monedero dixo que, aínda que as condicións do acordo en Galicia eran «unha trampa» de Sumar, á que acusou de «arrogancia», pedir o voto para outro partido «non debe estar nin en consideración».