A Coruña.- O comité intercentros da Corporación de Servizos Audiovisuais de Galicia (CSAG) anunciou que prepara a convocatoria de novas mobilizacións sociais contra o que considera unha deriva cara á privatización e a manipulación política da TVG e da Radio Galega. A representación da traballadoras denuncia o avance das externalizacións, a redución progresiva do persoal propio e a introdución de contidos de opinión en favor do Partido Popular nos espazos informativos e de actualidade dos medios públicos galegos.

Entre as novidades que cuestiona figura o arranque do programa Bos Días, que, segundo os traballadores, incorpora un espazo no que «se reproduce cada mañá como pura opinión o argumentario do Partido Popular». O comunicado estende a crítica ao espazo As claves do día, da Radio Galega, e aos diferentes programas de debate, onde, a xuízo do comité, «xa non existe entre as tertulianas unha pluralidade de voces». E sinala ao programa O Termómetro, cuxa privatización xa foi contestada o pasado ano mediante varias xornadas de folga. Segundo a representación sindical, utilízase para «colocar de raspallón na axenda das preocupacións cidadás as estratexias partidistas do PP».

O comité denuncia ademais o progresivo desprazamento da produción propia en favor de produtoras externas e asegura que se está creando «unha redacción paralela que controla os espazos informativos», e alerta de que co avance das externalizacións «xa case non quedan minutos de radiotelevisión pública libres de inxerencias». A esa situación suma a redución do persoal: das 831 prazas existentes na CSAG, as traballadoras denuncian que 110 están sen cubrir por xubilacións ou falecementos.

O comité intercentros convocou ás organizacións que participaron na plataforma en defensa dos medios públicos que protagonizou a manifestación do 6 de novembro de 2022 en Santiago de Compostela para preparar unha nova mobilización para reclamar o «rescate da CSAG» e frear a «perigosa deriva dos medios públicos». A representación social da Corporación alude tamén á campaña Liberemos A Galega, a iniciativa lexislativa popular promovida por esa plataforma en 2025 que foi rexeitada pola maioría absoluta do PP no Parlamento de Galicia. Luzes-Público dirixiuse á dirección da CSAG para solicitar a súa valoración da denuncia do comité intercentros, pero á hora na que se terminou de redactar este artigo non recibira resposta.

Resposta da CSAG

Con posterioridade á difusión deste artigo no xornal Público, a dirección da CSAG fixo chegar este texto:

«As acusacións e as actuacións do Comité Intercentros enmárcanse no calendario dos próximos meses en España e en Galicia.

Desde o respecto ás súas mobilizacións, a Corporación condena que o Comité Intercentros poña na diana, con nomes e apelidos, aos seus propios compañeiros e compañeiras.

A Corporación lamenta que o Comité Intercentros continúe o seu ataque ao sector audiovisual galego e que amplíe a súa ofensiva contra os traballadores e as empresas galegas que fan posibles programas como O Termómetro, A Penaltis, Galicia viaxeira ou En boa onda.

O cadro de persoal da CSAG está estabilizado ao 100%, os procesos selectivos en curso están perfectamente regulados e os tribunais das listaxes de contratación temporal acórdanse coa parte social.

Pola contra, fai falta lembrar que a maioría do comité intercentros negouse a asinar a consolidación de 255 postos de traballo. Con iso non respectou nin os seus propios acordos nin o acordo alcanzado por máis do 90% da asamblea de traballadores.

É a Corporación quen defendeu, defende e promove o emprego estable na CSAG, e quen defende que as empresas produtoras do sector audiovisual galego poidan traballar en Galicia no mesmo réxime de competencia que no resto do Estado».