A Coruña.- O novo ministro de Sanidade é un sanchista de primeira xeración con amplo currículo na docencia universitaria no sector sanitario e un marcado perfil político. O seu nomeamento reforza as súas posibilidades para candidatarse á presidencia da Xunta nas eleccións autonómicas previstas para o ano que vén.

José Miñones (Santiago, 1972) foi nun dos poucos alcaldes galegos que en 2016 arroupou ao hoxe presidente do Goberno cando foi derrocado da secretaría xeral do PSOE tras negarse a facilitar a investidura de Mariano Rajoy. A aristocracia socialista de entón temía un acordo con Podemos, así que provocou a súa saída e pretendeu levantar ao liderado do partido a Susana Díaz. Pedro Sánchez iniciou entón a súa «xira do Peugeot» 407, o vehículo co que percorreu as agrupacións socialistas do país, convenceu ás bases e acabou recuperando o poder no partido nunhas rifadas primarias. Miñones foi o seu baluarte en Galicia, e en 2021 Sánchez o designou delegado do Goberno na comunidade autónoma.

Fillo dun doutor en Farmacia con experiencia en política, o sucesor de Carolina Darias en Sanidade seguiu os pasos do seu pai e licenciouse na mesma especialidade en 1997. Tres anos despois doutorouse con premio extraordinario na Universidade de Santiago, onde exerceu como profesor de Química e Física da Facultade de Farmacia.

Cando apostou por Sánchez levaba apenas un ano como alcalde de Ames, o municipio residencial pegado á capital galega que a finais dos noventa foi enchéndose de novas urbanizacións habitadas por familias novas de clase media que impulsaron a súa renovación demográfica.

O modelo de alianza das esquerdas en Ames

Miñones, cuxo pai fora tenente de alcalde en Santiago, comprou un adosado alí e iniciou a súa carreira política á fronte dunha asociación veciñal local que o levou ás listas do PSOE en 2005 e a unha concellería en 2011. En 2015 se fixo coa Alcaldía nun Goberno local de coalición con Podemos, as mareas e o BNG, cun novo proxecto político baseado na alianza das esquerdas que hoxe segue funcionando cunha xestión que moitos en Galicia consideran modélica.

Segundo puido saber Luzes-Público a través dunha persoa que integra o Consello de Ministros, Miñones é un «socialista moi comprometido» que segue a liña de poñer en valor o municipalismo e que «exerce un liderado social moi xenuíno». Outro membro da Executiva do PSOE en Galicia engade que Sánchez tamén o querería á fronte do partido na comunidade: «É un tipo formado e conciliador. Será un bo ministro, e ademais ten un moi bo perfil para un candidato á Presidencia da Xunta».

A división que padece o socialismo galego e o impulso mediático que terá Miñones á fronte dun ministerio reforzan esa tese. O secretario xeral do PSdeG, alcalde das Pontes e presidente da Deputación provincial da Coruña, Valentín González Formoso, non logrou coser o partido tras as primarias nas que arrebatou o liderado da formación ao seu antecesor, Gonzalo Caballero.

Miñones logrou manterse á marxe da guerra interna cunha imaxe de político pragmático, eficaz e conciliador, cunha posición equidistante desde a que se permitiu exercer en ocasións como cabeza visible da oposición socialista a Feijóo, primeiro, e a Alfonso Rueda, despois.