As dependentas de Inditex do Estado rexeitan o «humillante» anticipo do 3% que lles ofrecen e volverán á folga o 11F

A Coruña.- . As dependentas de Inditex consideran insuficiente o acordo alcanzado o pasado mércores na mesa estatal de retribucións do grupo entre os sindicatos UGT e CCOO e a dirección da empresa de Amancio e Marta Ortega, e irán á folga o próximo 11 de febreiro. O acordo prevé aplicar unha subida do 3% como anticipo nas nóminas das empregadas de tendas situadas en provincias con convenios colectivos bloqueados ou decaídos.

«É vergoñoso, lamentable e humillante», asegura Sara Sánchez delegada da Confederación General del Trabajo (CGT), maioritaria entre as traballadoras de Zara e Lefties en Madrid. O sindicato decidíu convocar un novo paro similar ao que celebraron o pasado 7 de xaneiro.

A pesar de que ten máis de 165.000 traballadores por todo o mundo, deles máis de 46.000 en España, a empresa de Amancio Ortega non ten convenio colectivo para todas elas, polo que as condicións laborais de boa parte do seu persoal se rexen polos convenios colectivos provinciais de cada sector (téxtil, comercio etcétera). As dependentas denuncian que nalgunhas provincias os seus exiguos salarios levan conxelados unha década.

Un 76% das traballadoras de Inditex son mulleres, que superan o 90% de presenza entre o persoal das tendas e a quen na empresa coñécen como «las niñas». A maioría teñen contratos temporais sen xornada completa, en condicións precarias de horarios e libranzas e con salarios que en moitas ocasións non superan os mil euros mensuais.

Discriminación sexista

«É evidente que hai discriminación sexista. En departamentos onde os homes son maioría, como loxística e almacéns, os salarios chegan aos 2.000 euros, e ademais teñen axudas sociais por fillos, por dependentes con discapacidade, de comedor, etcétera, que a nós nos negan», engade Sara Sánchez. «Inditex vende unha imaxe de igualdade e de apoio ao desenvolvemento da muller que non se corresponde coa realidade», subliña.

Só nos dez primeiros meses do ano pasado, Inditex gañou 3.095 millóns de euros de beneficio neto. O seu fundador, Amancio Ortega, que posúe unha fortuna valorada en máis de 50.000 millóns, obtivo en dividendos máis de 3.112 millóns nos últimos catro anos. As melloras que reclaman as dependentas, segundo CXT, representaría 85 millóns, é dicir apenas o 2,8% das ganancias netas do grupo entre xaneiro e novembro do ano pasado.

«Dinnos que coa pandemia e a crise de Ucraína a empresa ten perdas e que temos que apertarnos o cinto, pero logo vemos na prensa como aos accionistas lles anuncian récords de vendas e de beneficios», engade a delegada de CXT.

Concentración de traballadoras de Inditex fronte a un comercio da empresa en Madrid, o pasado 7 de xaneiro. / Foto: CGT

O pasado mércores, as dependentas de Bershka, a marca de roupa xuvenil do grupo, desconvocaron a folga que anunciaran nas tendas de Vigo e Pontevedra despois de que a dirección aceptase recolocar ás 21 traballadoras dos comercios que prevé pechar na capital da provincia e en Vilagarcía de Arousa, mantendo ademais as súas actuais condicións laborais. Antes de que se mobilizasen, a empresa só aceptara recolocar a seis delas baixándolles os soldos e con peores horarios.

En novembro e en decembro pasado, as dependentas das tendas da Coruña, onde é maioritaria a Confederación Intersindical Galega (CIG), foron á folga despois de que UGT e CCOO subscribisen outro acordo que representaba unha subida de 123 euros mensuais que alcanzaría os 182 euros a finais de 2024. Tras as súas mobilizacións, a empresa accedeu a asinar un incremento maior: 322 euros que chegarán aos 382 euros ao final de 2024.

«O que conseguiron as compañeiras de Galicia é o exemplo de que non hai que ter medo a facerlles perder diñeiro, que é o que lles doe. É moi triste, pero é así», engade Sandra Sánchez en referencia á «previsible» convocatoria dunha folga en datas aínda por determinar.

As delegadas de CGT, e tamén da CIG, critican ademais que CCOO e UGT, que son minoría nas tendas de Madrid e Galicia, subscriban acordos coa empresa á marxe da representación sindical maioritaria. Ambas as centrais poden facelo dado que teñen a consideración de sindicatos máis representativos a nivel estatal en todos os sectores.

«Non hai que ter medo a facerlles perder diñeiro, que é o que lles doe»

No comunicado que UGT e CCOO fixeron público o mércores, as dúas centrais aseguran que na reunión da mesa de retribucións lograron «comprometer» á empresa para que cumpra o anuncio de que aplicará un anticipo do 3% a todos o persoal cuxos convenios estean conxelados, a. conta da cantidade que se acorde cando se negocien.

«Non se trata dun acordo, é un compromiso da empresa, ademais son anticipos que xa viñan facendo aínda que en menor porcentaxe, pero iso non é o máis importante», explica Álvaro García, responsable de Inditex en UGT. «O importante é que acordamos a recuperación dun incentivo de mil euros para as traballadoras a xornada completa e de 600 para as que teñen xornadas de menos de 24 horas semanais», é dicir o mesmo que rexeitaran as dependentas da Coruña, e que se abonará na nómina de febreiro.

García sinalou ademais que na reunión do mércores «falouse dun plus de 300 euros ao mes para 37.000 traballadores, de axudas sociais, calendarios, xornadas, libranzas de fin de semana, traballo pola tarde… A empresa non se pronunciou pero estivo receptiva», asegura o responsable de UGT, quen engade a disposición do seu sindicato para ir á folga se non hai acordo. «Non imos ter problemas con iso, pero para levantarse da mesa primeiro hai que sentar a dialogar e a negociar», dixo.

Luzes-Público tentou sen éxito obter a opinión de CCOO, que ao peche deste artigo o sindicato non ofrecera respondera ao ofrecemento.

cool good eh love2 cute confused notgood numb disgusting fail