Sara Marchena e Aurora Redondo participaron no programa Luar nun espazo de regueifas, unha disputa dialéctica improvisada desde o humor. Alí cantaron a favor do movemento #DefenderAGalega que reivindica a pluralidade informativa da cadea lonxe dos intereses políticos e gobernamentais.
O 16 de outubro Sara Marchena e Aurora Redondo participaron en Luar, un soado e veterano programa da Televisión de Galicia (TVG), concretamente, no espazo «Vai de regueifa», onde unha parella emprende unha batalla dialéctica desde a poética, o humor e a burla. Todo ía ben ata que Redondo comezou cuns versos que enfadarían á dirección do programa e que poderían significar a cancelación da sección: «E quedou boa noite para Defender A Galega».
Marchena, que xa levaba posta a camiseta da plataforma do xornalismo galego, respondeu: «Para Defender A Galega, dígoche de corazón, pluralidade informativa, menos manipulación». O público aplaudiu, pero o enfado da canle materializaríase tres días máis tarde da emisión. Unha chamada de teléfono o pasado luns avisou a Marchena de que pola súa «culpa», segundo explica, eliminarían a regueifa de Luar, aínda que non fose verdade, posto que este venres o programa continuou co concurso con normalidade e por iso a cantora -así se chaman a si mesmas estas artistas que narran e cantan de forma poética- decidiu publicar nas redes sociais a «bronca».
[Puedes seguir leyendo este artículo en castellano aquí]
«Non entendo a regueifa sen unha parte reivindicativa, política que lle chama algunha xente [de arriba] e polo tanto emprégoa como ferramenta de construción masiva», explica nun post de Facebook. «Falamos de feminismo, mesmo recriminándolle a un membro do xurado un comentario machista que fixo antes de saír nós», prosegue Marchena. E, ademais, defende tanto os seus comentarios como os da súa compañeira, así como a súa camiseta, «unha camiseta, non unha pistola nin unha navalla». Recoñece tamén que, nesa chamada, da que dá poucos detalles, alguén da cadea lle espetou un «quen che comería a ti a cabeciña para pensar que a regueifa é política?». Por iso, censura esa infantilización e paternalismo nos comentarios e pon por bandeira a regueifa feminista e a lingua como «unha arma moi poderosa».
As cantoras, cando alzaban as mensaxes sobre a manipulación da televisión galega, non se equivocaban. Con Aurora Redondo tamén contactaron. Primeiro, avisáronlle de que se cancelaba o concurso e dez minutos máis tarde, segundo relata en Twitter, rectificaron. A persoa coa que falou parece que non foi tan brusca como con Marchena, á que culpabilizaron da suspensión do espazo poético. «Eu penso como ti, pero os de arriba son os que manteñen este templo de cultura popular que é Luar» e ten que «diferenciar os espazos nos que se pode reivindicar segundo que cousa», díxolle un membro da canle pública. «Pola miña banda, se teño que aprender as ferramentas de retranca e comunicación a través do humor dos tempos do franquismo, crédeme que aprenderei a facelo para non desaparecer», engade no post Aurora. «Pero non vou deixar de dicir o que penso, de escoitar a quen menos privilexios ten e de falar explicitamente a favor da liberdade de expresión e contra a manipulación e a coacción».
A organización #DefendeAGalega fíxose eco do caso e denunciouno en redes sociais. O persoal da Televisión de Galicia leva máis de 120 «venres en negro» defendendo unha información lonxe das mans e os intereses da administración pública. Ante as eleccións autonómicas deste ano, esixiron a destitución inmediata do actual director xeral de CRTVG, Alfonso Sánchez Izquierdo, e pediron respectar a Lei de Medios. A TVG non cobre as súas protestas e o persoal seguirá resistindo ata que exista unha comunicación pública libre en Galicia, a mesma que piden, cantan e riman as regueifeiras.
Este artigo publicouse orixinariamente en castelán en Público como parte dun acordo de colaboración con este periódico. Aquí podes atopar máis artigos de Público en Luzes.
