O Tribunal Superior de Xustiza de Galicia tomba outro proxecto eólico autorizado pola Xunta no Roncudo, na Costa da Morte

A Coruña.- Iberdrola aceptou revisar o proxecto eólico que pretende levantar unha liña eléctrica na Serra do Larouco, no municipio ourensán de Baltar, na fronteira entre Galicia e Portugal, nunha zona frecuentada por afeccionados e profesionais do parapente e o á delta e considerada un dos mellores lugares do norte de España para practicar deportes relacionados co voo libre.

«Identificándose un problema co parapente, é necesaria un unha revisión do proxecto», confirmaron fontes da compañía, que aseguran que a empresa propoñerá «alternativas de trazado» ao seu plan orixinal.

Iberdrola presentou o ano pasado á Xunta un proxecto para construír unha liña de alta tensión de once quilómetros de longitu destinada a dar saída á produción eléctrica do parque eólico de San Martiño, que incluiría torres de ata corenta metros de altura e que afectaría directamente as áreas de voo que utilizan afeccionados, escolas e profesionais, xa que na zona se desenvolven habitualmente probas de varias disciplinas dos campionatos de Galicia, España, Portugal, Europa e da copa do mundo.

 

O proxecto levantou as protestas de Stop Eólicos, a organización que agrupa en Galicia a contestación social aos macroparques proxectados na comunidade con apoio da Xunta, así como dos veciños e dos afeccionados ao voo libre. Varias federacións e asociacións de Galicia, España e Portugal dirixíronse ao Executivo galego para advertir de que a liña de Iberdrola era incompatible coa práctica deses deportes dado que supoñía «un elevado risco de colisión e electrocución» para os parapentistas.

A semana pasada, Iberdrola reuniuse con portavoces dos afectados no Concello de Baltar e transmitiulles a súa intención de estudar alternativas ao trazado proxectado. «Mostramos a nosa preocupación polo posicionamento de calquera colectivo que poida verse afectado. Como sempre fixemos, faremos todo o que podamos para diminuír as molestias», engadiron fontes de Iberdrola.

A pesar das boas intencións da compañía que preside Ignacio Galán, algúns asistentes á reunión advertiron que, á marxe da afección sobre a práctica do voo libre, calquera trazado elixido por Iberdrola para atravesar a Serra do Larouco cunha liña de alta tensión tería serías consecuencias sobre o patrimonio natural da zona.

En Galicia conformouse unha sólida contestación social aos parques eólicos, despois de que as empresas eléctricas presentasen máis de douscentos novos proxectos, alentadas pola Xunta, que hai case un ano anuncioulles que impoñería unha moratoria para o 2022.

Segundo denuncia Stop Eólicos, moitos deses novos parques contarían con xeradores de centenares de metros de altura e estarían situados preto de núcleos de poboación en zonas de elevada riqueza natural, paisaxística e arqueolóxica.

O Tribunal Superior de Xustiza de Galicia (TSXG) anulou a semana pasada a autorización outorgada polo Executivo de Alberto Núñez Feijóo á empresa EDP Renovables para instalar novos xeradores no parque do Roncudo, no municipio coruñés de Ponteceso, na Costa da Morte. Os xuíces alegan que o Goberno galego vulnerou a lei ao reducir de trinta a quince días o prazo de alegacións ao informe de impacto ambiental do proxecto.

Na súa sentenza, o TSXG lembra que as normas europeas esixen que, antes de adoptar unha decisión definitiva sobre o proxecto e sometelo a información pública, «a Xunta debeu presentar os informes sectoriais», algo que non fixo e que impediu que os afectados puidesen «exercer de forma plena o seu dereito para participar de forma efectiva e con pleno coñecemento de todas as opcións que se presentaban».

Segundo lembran os xuíces, o Goberno galego está obrigado a garantir aos afectados «a posibilidade real de participar desde unha fase temperá nos procedementos de toma de decisións ambientais» e «a expresar observacións e opinións (…) antes de que se adopte unha decisión sobre a solicitude de autorización do proxecto».

A sesenta quilómetros ao leste do Roncudo, en Val do Dubra (A Coruña), o Colectivo A Rula, dedicado á protección e divulgación da arte rupestre e das contornas nos que se empraza, denunciou tamén que outro dos proxectos en trámite ameaza un conxunto prehistórico de petróglifos, túmulos e mámoas. Segundo A Rula, o parque pode afectar «irremediablemente» ao patrimonio histórico da zona.