O presidente da Xunta chega ás eleccións autonómicas despois de dous meses comparecendo na televisión pública galega convertido na imaxe da xestión da pandemia en Galicia, sen apenas pisar o Parlamento, eludindo o debate e sen autocrítica.
Galicia xa iniciou o seu camiño ás urnas e o presidente da Xunta de Galicia, Alberto Núñez Feijóo, leva vantaxe. O mandatario autonómico liderou a xestión da pandemia na comunidade, comparecendo exclusivamente na televisión pública galega en prime time e non a Consellería de Sanidade ou a Dirección Xeral de Saúde Pública. Eludiu o debate e o diálogo coa oposición incumprindo acordos, cancelando xuntas de portavoces e asistindo dúas veces á Deputación Permanente en toda a crise sanitaria, o único órgano de control ao seu mando.
O pacto entre os grupos políticos para ampliar o funcionamento do Parlamento que obrigaba ao presidente da Xunta a comparecer cada 15 días cancelouse pola convocatoria electoral. Este pasado mércores sería a primeira vez que Feijóo tivese que render contas sobre todo das residencias de maiores, pero o PPdeG decidiu romper o pacto, explicando que coas eleccións autonómicas finaliza o período de sesións da Cámara. Desta maneira, a oposición galega apenas puido meter man na xestión da crise da COVID-19, escapándoselle o itinerario do mando único de Feijóo.
[Puedes seguir leyendo este artículo en castellano aquí]
A crise do coronavirus permitiulle ao presidente da Xunta acaparar a atención mediática en Galicia. Que o líder do PPdeG utilice a CRTVG como medio de propaganda para difundir as medidas adoptadas polo seu Goberno para combater a pandemia e para atacar ao Goberno estatal non é unha novidade. O Comité Intercentros da Corporación de Radio e Televisión de Galicia (CRTVG) denunciou que a cobertura desde os medios públicos na pandemia está a ser «irresponsable», fundamentada en estratexias de manipulación informativas, baseándose en «criticar e desprestixiar» o mando da pandemia por parte do Executivo central.
O Comité expón nun comunicado enunciados que se emiten na televisión galega subliñando as frases de Feijóo, por exemplo: «Temos a taxa de letalidade máis baixa de España». Os datos achegados polo Ministerio de Sanidade reflicten que Galicia non é a máis baixa e que ten unha media parecida ao resto de comunidades, un 1%. «O Ministerio valora a posibilidade de deixar saír aos nenos, como propuxo o domingo pasado Feijóo», atribuíndo o mérito ao presidente da Xunta, ou «o Goberno galego segue traballando» e máis expresións que transmiten que en Galicia «todo vai ben porque goberna o PP, cando no resto do Estado a situación é de caos», explican desde a organización. Preguntado por este medio acerca destas críticas, o presidente alegou que cre na profesionalidade dos xornalistas e que cando a maioría dos galegos se informan a través dos medios públicos é porque atopan a información «veraz».
O día que anunciou a súa convocatoria electoral, o barón galego comunicou na TVG que o PPdeG xa gobernou «a crise do 2009, 2010 e 2011» e que a que está a chamar á porta «vai ser dolorosísima». A modo de aviso, trasladou en prime time que os votantes «terán que elixir cal é a persoa que cren que pode ter máis experiencia para xestionar unha Galicia complexa».
En comparación co Goberno de Sánchez
«Un clima de desconfianza xeneralizada». Así referíase Feijóo sobre o Goberno central na comparecencia telemática deste venres tras o Consello. Considerou que, en referencia ao acordo de PSOE e Podemos con EH Bildu, o Executivo estatal «enganou ao PNV, a Cs, ao propio Bildu e tamén se enganaron dentro do propio Goberno». Advertiu que España «non se merece este tipo de frivolidades» e que o acordo é un «disparate. Isto non se lle ocorre a ningún político no seu san xuízo».
O goberno de confrontación por parte do mandatario autonómico foi de menos a máis. Ao comezo do estado de alarma, Feijóo mostrouse favorable e comprensivo co Executivo central distanciándose do seu compañeiro de partido Pablo Casado, pero a medida que pasaban as semanas, o presidente ía dando golpes na mesa. O relato recruouse cando as eleccións asomábanse. Un Feijóo empezaba a alzar a voz en roldas de prensa e aproveitaba para tachar a xestión do Goberno, e que acentuou cando se barallou unha prórroga do estado de alarma. O venres pasado chegou a dicir nunha entrevista en Cadena SER que «é o peor momento da nosa historia democrática».
De feito, Feijóo atopou a oportunidade para cargar contra o Goberno PSOE- UP por manter no anonimato aos expertos que asesoran en Madrid a crise sanitaria. Pablo Casado acusou o presidente de incumprir a Ley General de Salud Pública e o grupo parlamentario levou a cuestión ao Congreso. Feijóo, desde Galicia, nomeou un por un o cargo dos integrantes e incidiu en que Galicia, a diferenza de Madrid, si transmite os nomes.
Feijóo: «Non dediquei un minuto á campaña electoral»
A oposición transmitiu nunha rolda de prensa este venres que hai unha semana que non teñen noticias de Feijóo, nin documentos nin recomendacións sobre as fórmulas a seguir para celebrar as eleccións autonómicas, algo que si ocorreu en País Vasco onde xa hai propostas que encaixan coa pandemia. De momento, en Galicia barállase fixar unha campaña electoral dunha semana segundo propuxo o PSdeG e acordarase co resto de forzas políticas. Aínda así, o presidente anunciou que todavía non está na súa axenda a campaña electoral senón a pandemia. «Non lle dediquei un minuto a temas de campaña electoral», engadiu.
Con todo, polo camiño da COVID-19 xa a sementou. Abandeirou o maior estudo epidemiolóxico «da historia do Sergas» e Turismo e Cultura xa anunciou o plan de reactivación económica e «emocional» que será o Xacobeo 2021, e que pretende nos próximos meses captar turistas nacionais e de Portugal. Cada vez que o Goberno recoñecía a falta de material a televisión galega rotulaba as compras da Xunta. As farmacias reparten á poboación con menos recursos máscaras enfundadas co propio logo da Administración. Nunha semana na que se produciron rebrotes do virus en Galicia, Sanidade falou de números positivos. Non se coñecen os datos exactos da COVID-19 en Galicia por provincias e municipios.
Nas horas de máxima audiencia e nunha das canles máis vistas en Galicia, o PP amparouse na Xunta sabendo que as sondaxes das eleccións erradas do 5A vaticinaban unha perda da súa maioría absoluta e que isto sería unha proba á súa solidificación. Amarrada unha convocatoria electoral, cun virus que circulou pouco e uns hospitais que aguantaron a pandemia, o horizonte electoral trazado por Feijóo semella máis favorable para os populares. A pedra máis grande polo camiño foron as residencias, onde se produciron a metade das mortes en Galicia, pero xustificouse con que foi unha tónica xeral ao resto do estado. A seguinte será o rebrote que se espera no outono. O 12X Feijóo, despois de once anos ao fronte da Xunta, opta á súa cuarta maioría absoluta, marca que só conseguiu o seu predecesor, Manuel Fraga (1922-2012).
