A Coruña.- Yolanda Díaz arrincou o pasado mércores a precampaña de Sumar en Galicia anunciando que o seu portavoz na comunidade será o politólogo e profesor universitario Paulo Carlos López, un dos perfís máis repetidos na contorna da vicepresidenta segunda e ministra de Traballo como posible cabeza de lista ás próximas eleccións autonómicas.

Nesa lista tamén figuran a deputada de Sumar no Congreso pola Coruña e portavoz do grupo parlamentario na Cámara Baixa, Marta Lois, e a súa compañeira por Pontevedra, Verónica Martínez Barbero.

Segundo asegurou a formación nun comunicado, o propia Barbero inscribiu xa a Movemento Sumar Galicia no rexistro de partidos políticos do Ministerio do Interior, definíndoo como «unha organización galega autónoma que estará federada con Movemento Sumar a nivel estatal» e que espera «aglutinar a intelixencia colectiva» de quen comparte «un proxecto de país aberto e inclusivo, construído desde o diálogo e escoita».

«Movemento Sumar Galicia nace para gobernar este país e queremos contar con todos os galegos e galegas coa única vontade de que a esperanza se abra paso en Galicia cun cambio», asegura López na nota de prensa, na cal subliña que os acordos de goberno no Estado asinados por Sumar e o PSOE garanten unha lexislatura beneficiosa para Galicia.

Adianto electoral
As eleccións autonómicas galegas están previstas para o próximo mes de xullo, pero todo parece indicar que o presidente da Xunta, Alfonso Rueda, podería adiantalas, previsiblemente a marzo.

Paulo Carlos López ten 37 anos e é veciño de Betanzos (A Coruña). Anteriormente, militou en Compromiso por Galicia e presentouse ás eleccións europeas de 2014 nunha candidatura conxunta con PNV e CiU. É doutor en Ciencia Política pola Universidade de Valencia e en Comunicación pola Universidade de Santiago, onde exerce como profesor no departamento de Ciencia Política e Socioloxía.