A Coruña.- A idea de que os próximos comicios locais e autonómicos deben referendar a Alberto Núñez Feijóo para as xerais de decembro fai que os resultados na súa terra se convirtan nunha sorte de exame para o candidato popular á presidencia do Goberno. Tamén para Alfonso Rueda, o seu sucesor na Xunta, quen poñerá o seu liderado a proba o 28M co ollo posto nas autonómicas galegas previstas para o verán de 2024.

O PPdeG debería telo fácil para saír airoso das municipais, pola sinxela razón de que nas anteriores obtivo o peor resultado da súa historia: un 33% dos votos, moi lonxe dos récords próximos ou por riba do 48% que lograba nos comicios locais nos tempos de Manuel Fraga.

«É verdade que os resultados de 2019 non foron bos, pero a márca PP está moito máis forte agora e ademais contamos co tirón do presidente nacional, que en Galicia suma moito», sinala Paula Prado, secretaria xeral do partido en Galicia e directora da campaña autonómica popular para as municipais. «Somos o partido que máis se parece a Galicia e temos candidatos e candidatas que combinan experiencia e mocidade», engade.

Prado advirte de que nas eleccións locais «vótase máis ao alcalde que ás siglas», pero admite que as municipais son «un termómetro para as xerais». «E para nós é un bo termómetro», apunta, tanto para as perspectivas de Feijóo como para as de Rueda: «Todo o que sexa consolidar gobernos a nivel territorial é moi positivo».

Menos do 21% dos galegos teñen hoxe un alcalde do PP

A pesar da folgada maioría no Parlamento autonómico que Feijóo obtivo en 2020 e que herdou Rueda, a nivel local menos do 21% dos galegos teñen hoxe un alcalde do PP, fronte ao 55% da poboación que vive en vilas e cidades con alcalde socialista e o 10% que teñen rexedor do BNG. A localidade máis poboada con alcalde do PP é Arteixo (33.000 habitantes). O resto dos 152 concellos onde esa formación ostenta o poder -hai 313 no país- teñen menos de 30.000 habitantes.

O principal reto do PP é recuperar ese voto urbano, que perdeu no 2019 e que lle deixou con só una das catro deputacións provinciais -Ourense, que mantén á conta de permitir que Gonzalo Pérez Jácome siga na Alcaldía da capital- e ningunha das sete cidades. Para que os resultados do 28M se puidesen ler como un respaldo a Feijóo, faría falta que recuperase algunha delas.

«A nós esíxellenos un plus que é gañar por maioría absoluta para poder gobernar, pero creo que temos posibilidades en varias das grandes cidades»

«A nós esíxellenos un plus que é gañar por maioría absoluta para poder gobernar, pero creo que temos posibilidades en varias das grandes cidades», asegura a secretaria xeral do PPdeG. Parece imposible logralo en Vigo, a cidade máis poboada de Galicia, onde a avogada Marta Fernández-Tapias, delegada territorial da Xunta, enfróntase á máquina de mallar de Abel Caballero (PSOE), que sacou ao anterior candidato popular a estarrecedora vantaxe de 54 puntos -máis de 101.000 votos fronte a menos de 21.000, o 67,6% fronte ao 13,6%-.

Para o PP, a cidade máis alcanzable parece en principio Ferrol, onde repite candidatura o exalcalde e exconselleiro de Feijóo José Manuel Rey Varela. Gañou as pasadas eleccións pero sen maioría absoluta, e o PSOE fíxose co poder co apoio da marea Ferrol en Común e do BNG. Ademais, o actual rexedor, o socialista Ángel Mato, bátese contra a lenda negra da cidade: nunca un alcalde ferrolán repetiu mandato en toda a historia da democracia.

En Ourense tamén repite intento un exalcalde, Manuel Cabezas, tamén exdiputado e exsenador, que gobernou entre 1995 e 2007 e o primeiro rexedor popular de España en oficiar unha voda entre persoas do mesmo sexo, tras a aprobación da lei que o legalizou baixo mandato do Executivo socialista de Zapatero.

Dezaseis anos despois de deixar a Alcaldía, Cabezas lamenta que só queden «restos e cinzas» do que considera os seus logros, que Pérez Jácome fixese «unha xestión ruinosa dos recursos económicos» do Concello e que a situación interna do Consistorio sexa  «de absoluta falta de moderación, de respecto e de educación».

Cabezas tamén repetiu a promesa de Feijóo en 2019 de que nunca daría a Alcaldía a Pérez Jácome, vulnerada entón para lograr a presidencia da Deputación, pero el agora faino con máis contundencia e xa asegurou que «xamais» pactará con el. Do mesmo xeito que Prado, asegura que se move «nun único escenario que é o da maioría absoluta». «Como a que tivemos nos anos 1995,1999 e 2003 e que foi o que nos permitiu facer todo o que fixemos, unha maioría absoluta que nos permita gobernar e que nos permita facer o que necesita Ourense en menos tempo», asegura. «Ourense terá un alcalde distinto ao que ten hoxe si ou si», promete.

A crenza de que o PP arrasa en Galicia non é certa

A crenza de que o PP arrasa sempre en Galicia non é certa. Feijóo obtiña maiorías absolutas nas eleccións autonómicas, pero non sucedía igual nas xerais -en 2019 os populares perderon en abril e en novembro gañaron pola mínima ao PSOE, que lles empataron en escanos ao Congreso- nin nas europeas -os socialistas sacáronlles 76.000 votos de vantaxe ese mesmo ano-.

Nas locais de 2019 os populares perderon no cálculo total en Galicia, pero é verdade que gañaron en número de concellos -o PSOE ten 11 e o BNG, 29-, deles tres cidades: ademais de Ferrol, foron o partido máis votado en Lugo, onde repite candidatura a presidenta provincial, Elena Candia, e na Coruña.

«Os demais só se poñen de acordo para que non goberne o partido que gaña as eleccións»

Nesta última cidade superaron ao PSOE por apenas o 0,02% dos sufraxios -400 votos-, e a socialista Inés Rey chegou á Alcaldía grazas ao apoio de Marea Atlántica e o BNG. Agora, o novo candidato, o exsenador Miguel Lorenzo, do mesmo xeito que Paula Prado, aposta por «un goberno maioritario» do PP fronte ao que, advirte, a única alternativa sería «un cuadripartito PSOE-BNG-Marea Atlántica-Podemos, que só se poñen de acordo para que non goberne o partido que gaña as eleccións, como sucedeu en 2015 e 2019».

«A Coruña necesita que a cidade volva ser un referente e de novo líder en benestar, seguridade, limpeza, vivenda, cultura, deporte e oportunidades para todos, e deixar de selo no que somos na actualidade: número de delitos, sucidade e abandono dos barrios», estima o candidato.

En Pontevedra, onde o BNG de Miguel Anxo Fernández Lores capta boa parte do voto do PP e do PSOE, os populares parecen telo tamén complicado para lograr a maioría absoluta. En Santiago aspiran polo menos a achegase a ela, tras os escándalos que provocaron a dimisión de varios concelleiros do equipo de goberno do socialista Xosé Sánchez Bugallo.

En calquera caso, Paula Prado asegura que tanto ela como toda a organización do seu partido están desexosos de que se inicie a campaña electoral. «Sucede como aos xogadores de fútbol. Que prefires, saber do resultado do teu equipo pola radio, ou saír a xogar o partido?».