Chachas necesitadas

«No pasa nada. ¿Hay nueve votos? Poned diez. Las leyes son como las mujeres, están para violarlas». Quen así falou foi José Manuel Castelao Bragaña, exdeputado do PP no Parlamento galego e exdirector da Fundación Galicia Emigración, entre outros cargos. Era o ano 2012.
       «Parecíame que a señora Pontón estaba moi necesitada pero vostede aínda o está máis». Ano 2018. O presidente da Xunta de Galiza, Alberto Núñez Feijóo diríxese nestes termos á portavoz nacional do BNG, Ana Pontón.
       «Es un órgano político gobernado por el Ayuntamiento de Vigo, por el anciano Abel Caballero y su chacha para todo, que es Carmela Silva» o alcade de Vilanova de Arousa refírese así á presidenta da Deputación de Pontevedra.
«Chochito de oro» a Sáenz de Santamaría; «cada vez que le veo la cara y esos morritos pienso en lo mismo» a Leire Pajín; «estaría mejor haciendo punto de cruz», a Fátima Báñez; «puta barata podemita», a Cristina Maestre; «en una sociedad seria y sana, estaría limpiando suelos y no de alcaldesa de Barcelona», a Ada Colau; «debatir con una mujer es complicado porque mostrar superioridad intelectual o la que sea da una impresión machista ante una mujer indefensa» Arias Cañete a Elena Valenciano; «¿Por qué las tiorras separatistas, ora vascongadas, ora catalanas, ora de Bildu, ora de la CUP, han de ser tan feas, en referencia a Anna Gabriel.

Imaxinan… «Que máis dá a independencia de Catalunya, quen gaña en mellor peiteado, Puigdemont ou Rajoy?»

Podería seguir así todo o día e non chegaría o espazo do que dispoño aquí para dar conta do sexismo e a misoxinia que soportan as mulleres en calquera ámbito, lugar ou situación, tamén no exercicio da representación pública.
«Que máis dá o Brexit, quen gaña o concurso de pernas?», titulaba en portada o Daily Mail co gallo dun encontro entre a primeira ministra de Escocia, Nicola Sturgeon, e a primeira ministra británica, Theresa May. Imaxinan… «Que máis dá a independencia de Catalunya, quen gaña en mellor peiteado, Puigdemont ou Rajoy?», resultaría estúpido, inadmisíbel e ofensivo abrir en primeira cun titular coma este, non é?
Lembran a entrevista a Inés Arrimadas? Alguén decidiu que a súa cabeza era prescindíbel na imaxe (na imaxe que acompaña unha entrevista!!) porque xa saía a do presidente da súa formación en segundo plano. Cren posíbel que isto acontecese se se tratar dun home? Permítanme un spoiler: NON.
Ás mulleres non se nos rebaten ideas, nin proxectos políticos, nin argumentos, cualifícasenos constantemente polo noso aspecto físico, pola roupa que vestimos ou a nosa vida privada. «No es malota sexualmente», chegamos a escoitar en referencia a Dolores de Cospedal.
O sexismo no debate político faise máis evidente de maneira proporcional ao aumento da presenza de mulleres en espazos que até hai ben pouco nos estaban vetados, deixando en evidencia que o machismo o impregna todo. Todas as estruturas. E iso non muda apenas porque, de súpeto, as mulleres esteamos aí. Todo o contrario.
E agora cavilen en algo. Se isto é así en público, pensen en todo o que soportamos as mulleres e que ninguén ve.

 

 

cool good eh love2 cute confused notgood numb disgusting fail