O presidente da Xunta de Galicia segue a liña do lehendakari vasco e convoca eleccións autonómicas o domingo 12 de xullo, apoiándose nuns informes sanitarios e xurídicos que a oposición rexeitou.
O presidente da Xunta de Galicia, Alberto Núñez Feijóo, anunciou que as eleccións autonómicas terán lugar o 12 de xullo coincidindo co lehendakari vasco, Íñigo Urkullu, como vén sendo costume. O líder do PP xustificou a chamada ás urnas en pleno estado de alarma a partir de informes sanitarios e xurídicos, desestimados pola oposición, que recollen o 12 de xullo como a data «menos insegura», xa que a partir da terceira semana do mes a situación pode empeorar e desembocar nun rebrote da covid-19 no outono.
O presidente informou de que atendeu aos documentos dos expertos sanitarios e legais que aseguran que a medida que pase o ano «aumentan as incertezas e a inseguridade xurídica» xa que o seu mandato termina en setembro. Ademais, para a poboación o grao de exposición ao virus é maior polo baixo percorrido en Galicia e a baixa inmunidade dos galegos, algo que se pode agravar coa chegada de turistas no verán.
[Puedes seguir leyendo este artículo en castellano aquí]
Desta maneira, o proceso electoral comezará desde o principio e non como se deixou antes de cancelalo o 5 de abril, retomando de cero coa elaboración das listas e tomando medidas explícitas de seguridade, segundo informou o presidente. Tamén, comunicou na rolda de prensa que espera a colaboración da Administración central e así llo pediu ao presidente do Goberno, Pedro Sánchez. A duración da campaña será de 15 días de forma que tanto en Galicia como en Euskadi empezará o 26 de xuño.
«Hoxe escoitei a determinados grupos que consideran que eu quero reducir a campaña, nin quero nin non quero, é responsabilidade de cada partido», sostivo Feijóo, que deixa en mans dos propios partidos e o seu presidente a decisión de reducir ou non a campaña. Si que engadiu que informará ao seu partido para que os actos do PP sexan máis pequenos.
Tamén na comparecencia notificou que as fases de desescalada irán determinando os detalles dos comicios, por exemplo, confirmarán se os usuarios das residencias poden ir votar ou non ao ser poboación vulnerable. O presidente da Xunta sostivo que a prioridade segue sendo o virus pero que non «podemos arriscarnos a que finalice a lexislatura e que teñamos que enfrontarnos a unha situación inédita na que Galicia non teña presidente, por iso decidín convocar eleccións», engadiu.
O barón galego cre que a celebración dos comicios é «inoportuna» pero prefire que Galicia teña un «presidente lexítimo» e un parlamento «en plenas funcións». Feijóo comunicou que as eleccións se celebrarán con «todas as garantías sanitarias», tamén para os que estean na mesa electoral. Esta tarde o comité clínico tratará as medidas para seguir e garantir a seguridade na xornada do 12 de xullo para votar «sen medo».
Unhas eleccións sen acordo
Na rolda de prensa na televisión galega Feijóo criticou que a oposición non expuxo «alternativas» á data electoral nin informes «de ningún experto», e que tivo que elixir entre as súas palabras e o que recomendaron «por escrito» os médicos e a asesoría xurídica da Xunta. Tamén contou que na reunión cos partidos a semana pasada, algún grupo propuxo convocalas en agosto, outro en setembro e outro en outubro, pero que os documentos reflectían que a mellor é «canto antes, a principios de verán».
A oposición afeou a Feijóo tachándoo de «irresponsable» e cualificou como «unha temeridade» convocar eleccións durante o estado de alarma. A semana pasada o presidente reuniuse coas forzas políticas galegas para abordar a convocatoria electoral. Foi rexeitada polo PSdeG-PSOE, Galicia en Común Anova-Mareas e BNG. Si foi apoiada por Ciudadanos, que non ten representación na Cámara e por En Marea, que valorará se presentarse ou non.
O portavoz de Galicia en Común- Anova Mareas, Antón Gómez Reino, asegurou este luns que Feijóo non avisou aos grupos sobre a data electoral e que desde o xoves pasado, cando mantiveron a reunión, non souberon nada por parte da Xunta. «Empregaremos todas as medidas necesarias para garantir que non se poña en risco a saúde», asegurou nunha rolda de prensa antes do anuncio electoral de Feijóo. Cre que o presidente convocou en xullo porque «pode ser un bo momento para a súa estratexia electoral» empregando e «ocultando o PP baixo o nome da Xunta».
O secretario xeral do PSdeG, PSOE, Gonzalo Caballero, postulou que «Feijóo impón un calendario electoral que os galegos non seguen» e que «está a escribir as últimas páxinas» á fronte do Goberno da Xunta de Galicia. Tamén, asegurou que o grupo dos socialistas está «preparado» para «darlle a Galicia un proxecto de compromiso» coa sanidade pública e unha «política de reconstrución» na recuperación da crise económica.
«Urkullu volve anunciar a convocatoria electoral en Galicia»
Así comezaba a súa rolda de prensa a líder do BNG, Ana Pontón, horas antes de que Feijóo anunciase a data electoral pero xa cando se sabía que Urkullu estaba a manter un consello extraordinario para abordar os comicios. Tachou ao presidente da Xunta de facer «seguidismo» e de xogar con «lume» xa que o decreto prevé a posibilidade de ter que cancelar eleccións ante un rebrote da COVID-19.
Pola súa banda, Pontón considera que Feijóo xa fixo campaña electoral «acaparando» a televisión pública galega e o mesmo recolleu tamén o presidente na súa comparecencia, onde expuxo que algúns partidos xa comezaran a campaña hai tempo.
Durante o estado de alarma, o presidente da Xunta negou varias veces que as eleccións formasen parte da súa axenda aínda despois de que Urkullu informase da súa predilección por xullo para chamar ás urnas. Non foi ata unha chamada da vicepresidenta Carmen Calvo dándolle permiso para convocar eleccións cando demostrou a súa estratexia electoral. «Diminuír» o calendario dos comicios no estado é a xustificación que deu o presidente da Xunta para facer coincidir a data co lehendakari por quinta vez consecutiva se se ten en conta os comicios cancelados de abril.
Desde 2009 chama ás urnas con País Vasco e a decisión deulle a maioría absoluta durante once anos. En Galicia, o panorama político debúxase moi distinto aos anteriores debido a que apuntan a unha perda de votos do PP e á entrada da ultradereita na Cámara galega, Vox. O PSOE e Galicia en Común vense favorecidos polos seus compañeiros de partido no Goberno. As eleccións autonómicas de 2020 en Galicia serán diferentes e o único claro é a incerteza derivada da covid-19, que pode cambiar o escenario dun momento para outro.
Este artigo publicouse orixinariamente en castelán en Público como parte dun acordo de colaboración con este periódico. Aquí podes atopar máis artigos de Público en Luzes.
