A Coruña- A candidata do BNG á presidencia da Xunta, Ana Pontón, cansouse de dicir durante as últimas semanas, mesmo antes de que Rueda anunciase o adianto das autonómicas, que hai moitas formas de sentirse galego e galega.

A afirmación parece unha obviedade, pero poida que nela resida a clave dos resultados das eleccións do próximo domingo.

O BNG pechou este venres en Santiago unha campaña entusiasta, como a definiu a alcaldesa de Santiago, Goretti Sanmartín. Unha campaña que lle saíu redonda a Ana Pontón.

A líder nacionalista foi sempre por diante dos seus rivais, especialmente de Alfonso Rueda, e conseguiu que desde hai días se instale na opinión pública a idea de que o cambio é posible. E de que se é posible é precisamente grazas a ela.

«Gustaríame que estivésedes aquí, no meu sitio, agora, vendo o que eu vexo e sentindo o que levo sentindo desde hai días», dixo ás preto de 3.000 persoas que a rodeaban enchendo o pavillón multiusos do Sar. «Este país xa cambiou, e o domingo imos facer historia», engadiu.

As enquisas auguran un resultado moi axustado entre o voto conservador ao PP e o voto ás forzas progresistas, con valores moi diferentes. Pero no que todas coinciden é que o BNG chega ao domingo en tendencia á alza, mentres que o PP faino claramente á baixa.

Niso reside a idea-forza (concepto á vez viejuno e moderno) do que di Pontón sobre as formas de sentirse galego ou galega. Porque a candidata nacionalista logrou entrar no electorado galeguista do PP que non apreza en Rueda os valores que advertía en Feijóo, e ofrecerse como alternativa solvente a un «candidato ausente», como o definiu, que escapou sempre que puido dos debates con ela.

«A todas as persoas que queren cambio pídolles que collan a papeleta do BNG, non importa o que votasen noutras ocasións», dixo, e insistiu, en referencia a ese caladoiro de votantes galeguistas do PP: «Hai moitas maneiras de sentirse galego e de sentirse galega, e todas son necesarias para construír Galicia».

Pontón tratou de facer, e por momentos logrouno, un discurso emocionante, apelando á causa palestina e aos valores da identidade cultural galega.

«O BNG simboliza todas as causas xustas, é a papeleta das persoas que enchen as rúas para defender a sanidade pública, un futuro para a xente nova, para que se cumpra o dereito á vivenda, que as persoas maiores teñan unha vellez tranquila, para coidar do noso mar e do noso territorio».

O peche de campaña do Bloque tamén serviu de catarse para unha organización que hai apenas unha década se desangraba entre rifas internas.

Xunto ás caras novas, na súa maioría mulleres, coas que Pontón rexuveneceu, feminizou e modernizou o partido, arroupárona históricas glorias do nacionalismo galego como Xosé Manuel Beiras, Camilo Nogueira, Francisco Rodríguez ou Alfredo Suárez Canal.

«Todos e todas temos a oportunidade de sentirnos protagonistas deste cambio», concluíu a candidata, como dando a entender que hai moitas formas tamén de sentirse (ou) non nacionalista, pero que todas conducen ao BNG.