A Coruña.- Unha trintena de eurodeputados e eurodeputadas de tres grupos diferentes −socialistas, verdes e liberais− concentráronse o pasado martes na sede da Eurocámara en Estrasburgo para solidarizarse con Galicia e para reclamar á UE un control máis firme sobre o transporte marítimo de pellets.

Os eurodeputados reuníronse a pedimento de Ana Miranda, do Bloque Nacionalista Galego (BNG), que promoveu un debate na Eurocámara sobre a crise da vertedura de pellets en Galicia, e que reclamou na Comisión de Medio Ambiente «medidas máis estritas» para os buques que transportan pellets e plásticos perigosos.

Entre os representantes que acudiron á chamada do BNG figuran o socialista portugués Joao Albuquerque, relator do informe parlamentario sobre microplásticos; a francesa Catherine Chabaud, do grupo Renovar Europa; e a alemá Ska Keler, do grupo da Verdes-Alianza Libre Europea.

«Pedimos a inclusión do transporte marítimo no aumento dos controis estritos para evitar perdas accidentais no transporte marítimo de pellets», sinala nun comunicado a eurodeputada do Bloque.

Informe sobre os microplásticos

Miranda engade que as propostas que presentou ao informe sobre os microplásticos que prepara o Parlamento Europeo inclúen, entre outras, as da Asociación para a Defensa Ecolóxica de Galicia (Adega).

«En 2023, a Organización Marítima Internacional acordou prohibir o transporte a granel de pellets de plástico á vista de accidentes graves anteriores. Por tanto, procede aplicar dita prohibición ao transporte marítimo dentro, cara a e desde a Unión», sinala unha das enmendas presentadas polo BNG.

A eurodeputada nacionalista destacou a «gran preocupación» que provocou nas institucións europeas e especialmente entre os eurodeputados a vertedura en Galicia, e a importancia de que fose aceptada a proposta do BNG para incluír na orde do día do debate do xoves a situación creada na comunidade.