Foto da portada de Iván Iglesias _OU ké!

A Coruña.- A Fiscalía de Ourense abriu dilixencias penais de investigación polos audios e mensaxes publicados por Luzes-Público nos que o irmán do expresidente da Deputación de Ourense e hoxe senador por designación autonómica, Manuel Baltar, recoñece mordidas de empresarios da construción e financiamento ilegal do PP.

O pasado 27 de maio, este diario desvelou varias gravacións e unha ducia de mensaxes curtas de texto (SMS) e de Whatsapp nos que José Luis Baltar falaba das comisións que tanto el como o seu irmán e a formación á que o segundo pertence recibirían de empresas que contrataban obra pública coa institución provincial.

Do contexto e a literalidade desas conversacións deducíase que o expresidente da Deputación de Ourense sería, presuntamente, coñecedor e beneficiario das mesmas.

O fiscal Mario Brualla González solicita que se lle remitan «os orixinais das gravacións de audio, SMS e whatsapp do artigo publicado o 27 de maio de 2023 baixo o título «O irmán de Baltar recoñece mordidas e financiamento ilegal do PP: ‘Ata que me dean os 8.000 teñen pechado a billa’».

Ademais, pediu que sexan identificados «os interlocutores ou comunicadores» desa información

Segredo profesional

Público remitiu á Fiscalía a documentación publicada e púxose á súa disposición para colaborar con para enviarlle toda da que dispón sobre o caso, pero declinou identificar as súas fontes amparándose no dereito ao secreto profesional que recolle o artigo 20 da Constitución Española.

Tamén tratou de poñerse en contacto co fiscal Brualla para coñecer o estado das súas pescudas, pero este rexeitou responder o ofrecemento alegando que «as dilixencias de investigación son segredas» e que «non ten a delegación para falar cos medios de comunicación».

Tras a publicación da información de Luzes-Público, tanto o PSdeG como o Bloque Nacionalista Galego (BNG) na Deputación de Ourense reclamaron explicacións a Baltar, que o expresidente da institución negouse a ofrecer. Tampouco quixo dar a coñecer a súa versión a través destes medios Posteriormente, o BNG presentou un escrito de denuncia na Fiscalía ourensá.

Baltar, que segue presidindo o PP provincial de Ourense, foi elixido o pasado 28 de xullo senador por designación autonómica no Parlamento de Galicia en substitución do presidente do PP, Alberto Núñez Feijóo, pouco máis dun mes despois de renunciar á Deputación, acosado por varias denuncias de corrupción e polo proceso penal aberto contra el por un delito contra a seguridade viaria, tras ser sancionado por conducir o seu coche oficial a 215 quilómetros por hora.

Aforamento e suplicatorio

Na súa condición de senador, Baltar goza agora de aforamiento e non pode ser xulgado polos tribunais ordinarios, de forma que o Tribunal Supremo deberá remitir ao Senado un suplicatorio para poder xulgalo.

Esa petición será sometida á Comisión de Suplicatorios do Senado, que elaborará un ditame que á súa vez será sometido en sesión secreta á valoración e votación do pleno. O PP ten maioría absoluta na Cámara Alta.

O presidente do PP provincial enfróntase a outra denuncia do PSOE por falsidade e suplantación de identidade, ao negarse noutra ocasión para identificar ao seu chofer como condutor do coche oficial, a pesar de que el mesmo viaxaba con el cando o vehículo foi detectado pola Garda Civil de Tráfico excedendo tamén os límites de velocidade.

Ademais, Baltar non explicou aínda por que a Deputación se negou a identificar ao condutor do coche oficial en varios expedientes sancionadores máis, que o organismo tivo que asumir pagando con diñeiro público o triplo da multa inicial; nin por que en polo menos outros dous quen aparecen como condutoras son a esposa e á filla do seu chofer persoal; nin por que esta última obtivo unha praza fixa de funcionaria na Deputación poucos meses despois deses feitos; nin por que ese chofer cargou á Deputación máis de 3.000 euros en comidas e agasallos atribuídos ao hoxe expresidente.