Advirten de que coa nova norma será imposible para quen non teña experiencia no sector público obtelas nin aínda sacando a nota máis alta na oposición

A Coruña.- Andrea ten 44 anos, é licenciada en Química e ata hai dous anos traballaba de profesora nun instituto privado. Pero decidiu deixalo e estudar oposicións para ter un traballo máis seguro no ensino público.

En setembro pasado matriculouse nunha academia, á que paga 140 euros mensuais. Foi antes de saber que o Goberno proxectaba acabar coa temporalidade dos funcionarios cunha nova norma que, asegura, privilexia a posición dos interinos fronte á de quen, como ela, opositan sen apenas experiencia laboral nunha administración pública.

«Coa modificación da normativa vai ser imposible que un opositor sen experiencia poida superar a un interino de longa duración», afirma Andrea, que vive en Lugo e prefire utilizar un pseudónimo para contar o seu problema.

Forma parte da Plataforma Turno Libre, que agrupa a miles de opositores de toda España afectados pola lei de medidas urxentes para a redución da temporalidade no sector público que o Goberno aprobou o pasado 28 de decembro. Este sábado convocaron unha manifestación na praza do Obradoiro de Santiago.

A nova lei obriga ás administracións públicas a sacar a concurso-oposición antes do próximo 1 de xullo as prazas ocupadas por traballadores temporais, xeneralizando un cambio de método no acceso a elas que prexudica a quen oposita sen experiencia previa.

Resérvanse, ademais, prazas sen concurso para quen as ocupara durante cinco anos, e establécense procesos de concurso-oposición nos que a nota do exame representará só o 40% da baremación final do candidato.

«Con esas normas, un opositor sen experiencia que saque un dez no exame e que no baremo do concurso obteña a puntuación máxima que pode obter, dous puntos, terá unha nota menor que un interino que saque un cinco na oposición pero que some dez puntos por longa duración», laméntase Andrea, quen critica ademais aos sindicatos que negociaron a norma co Goberno:

«As súas bases son interinos de longo percorrido. CCOO, UXT e CSIF apoiárono, e a CIG púxose de perfil, non se molla e non protestan», sinala.

O Goberno defende que a nova norma «negociause cos representantes dos traballadores do sector público e tamén cos diferentes niveis da Administración», que permitirá reducir a temporalidade dos empregados públicos por baixo do 8% e que cumpre cos compromisos coa Unión Europea e coas sentenzas do Tribunal de Xustiza da UE e o Tribunal Supremo.

Para as opositoras, en cambio, supón unha discriminación evidente, e vulnera varios preceptos da Constitución Española, entre eles o recollido no seu artigo 23.2, que garanten que os cidadáns «teñen dereito a acceder en condicións de igualdade ás funcións e cargos públicos».

«Entendemos a problemática dos interinos, aínda que é certo que non todos accederon ás súas prazas da mesma maneira e a casuística é moi variada segundo o tipo de Administración. Pero non é xusto que se resolvan os seus problemas á conta dos nosos dereitos», narra Alba Díaz Pumar. Ten 28 anos, é licenciada en Dereito e desde hai dous anos prepara oposicións ao corpo xeral da Administración autonómica.

Alba advirte ademais de que outorgar prazas sen oposición ou a interinos que non tiveron que preparalas co mesmo rigor que elas significa «devaluar a prestación de servizos da Administración pública». En Galicia iniciaron o seu calendario de protestas porque, segundo explica, a nova lei «deixa o seu desenvolvemento en mans de cada comunidade autónoma». «Imos tentar que a Xunta corrixa ese agravio», conclúe.