Luzes-Público tamén ofreceu á conselleira que valore se o seu apoio público a Villares pode entenderse como unha advertencia tácita de que a denuncia contra el é falsa; se considera que a filtración do nome da muller, o mesmo día en que Villares dimitiu, vulnera a súa intimidade, a revitimiza e contribúe a incrementar o seu sufrimento; e se cre que a resposta institucional da Xunta e o seu presidente, amparando o exconselleiro do Mar sen sequera mencionala, pode causar indefensión a todas as vítimas de violencia machista que denuncian a persoas con responsabilidades políticas ou institucionais.

Ao peche deste artigo, a conselleira non respondeu ata o de agora ningunha desas preguntas.

«Cómplice dun espectáculo machista»

A portavoz nacional do BNG, Ana Pontón, recriminou este mércores a Rueda no pleno do Parlamento de Galicia que despedira a Villares «entre aplausos e eloxios», lanzando «a demoledora mensaxe de que ante unha denuncia desas características, o presidente da Xunta ampara o presunto agresor e desprotexe a vítima». A deputada nacionalista Noa Presas, vogal do BNG na comisión de estudo para a Igualdade e para os Dereitos das Mulleres da Cámara autonómica, recriminou ademais a Fabiola García que se comporte como «unha cómplice máis neste espectáculo machista».

Pola súa banda, o secretario xeral do PSdeG, José Ramón Gómez Besteiro, lembrou que Rueda usou a maioría absoluta do PP para evitar explicar no pleno o sucedido con Villares –«o seu silencio avergoña», dixo–. O presidente da Xunta, que admitiu que sabía da denuncia contra Villares desde febreiro pasado, respondeu apelando ás polémicas do Goberno en Madrid, acusando a oposición de querer «dar leccións» de ética política sen dicir «nin chío dos Koldos, as Jéssicas, os Aldamas, os Cerdanes, os pisos…».

Rueda viviu onte a primeira protesta contra a súa xestión do caso Villares durante a visita que realizou poucas horas despois do pleno á sede do Centro de Investigacións Mariñas (CIMA) da Xunta en Vilanova de Arousa (Pontevedra). Unha vintena de persoas, convocadas pola Plataforma en Defensa da Ría de Arousa (Pedra), que agrupa a colectivos de mariscadoras e organizacións ecoloxistas e veciñais, esperábano con pancartas para alertar da situación do estuario e tamén, segundo a PDRA, para manifestar o seu «total desacordo [coa decisión de Rueda] de encomiar e protexer un presunto agresor sexual no canto de solidarizarse» coa vítima.

Rueda visitou o CIMA en compañía da nova conselleira do Mar e substituta de Villares, Marta Villaverde, quen tamén se posicionou en defensa do seu antecesor e que nos sete días que leva á fronte da Consellería do Mar tampouco tivo palabra algunha para denunciante.

Doutra banda, quince asociacións feministas de Galicia, entre elas a Marcha Mundial das Mulleres e Xornalistas Galegas, asinaron un manifesto de repulsa que titulan «Machistas, fóra das institucións» e no que condenan «o comportamento de todo o Goberno do Partido Popular á fronte da Xunta» e o «espectáculo mediático» de quen «aproveitando a súa situación de poder e control sobre os medios de comunicación» se expresaron en defensa do conselleiro.

«Desde que se coñeceron os feitos», advirten as feministas, «non houbo nin unha soa mensaxe pública por parte do presidente Alfonso Rueda, nin da conselleira de Política Social e Igualdade, Fabiola García, nin de Roberto Barba, director xeral contra a Violencia de Xénero, manifestando tolerancia cero cos agresores sexuais nin esixindo xustiza e reparación para a vítima».