Dous meses antes de que Feijóo pretenda convocar eleccións autonómicas en Galicia, a sombra de Marcial Dorado e unha das polémicas máis críticas da súa carreira política volven salpicalo. Sete anos despois da publicación da súa soada foto, a versión do narcotraficante sobre a relación e o fin da súa amizade contradí a do presidente da Xunta en Lo de Évole.
Jordi Évole entrevistou o narcotraficante galego Marcial Dorado. A data de emisión do programa sería o 15 de marzo e coincidiría coa campaña electoral galega, pero a crise da Covid-19 impediu a celebración dos comicios autonómicos. Antes de que o presidente da Xunta, Alberto Núñez Feijóo, convoque eleccións en xullo para renovar o seu mandato na Xunta, a relación con Dorado volve incomodar o escenario político do mandatario.
A Marcial Dorado detéñeno en 2003 e, aínda que afirma que non lle gusta dar entrevistas, accede a un encontro con Jordi Évole, a primeira vez que se escoita da súa boca a relación co presidente da Xunta. Leva 13 anos no cárcere, pasou por 22 prisións, foi condenado por narcotráfico, branqueo de capitais e por suborno a dous axentes da Garda Civil. Aínda así, Dorado nega ser narcotraficante, e asegura que, de selo, «sería dos bos» e «non estaría no cárcere».
[Puedes seguir leyendo este artículo en castellano aquí]
Ademais da súa actividade coas drogas, Dorado é coñecido pola súa relación de amizade co presidente da Xunta e por unhas fotos de 1995 publicadas en El País en 2013, onde se lles ve a ambos nun barco. Este feito marcaría a imaxe do actual líder autonómico ao vinculalo cun dos narcotraficantes máis populares das Rías Baixas. En canto ás fotos, Feijóo recoñeceu en Salvados que eran «difíciles de explicar» e que tivo que dar «moitas explicacións» sobre as mesmas. Agora tenta esquivalas coa escusa de que as imaxes teñen máis de 20 anos. E é que, durante a década dos 90, Feijóo e Dorado compartiron unha amizade, con viaxes a Ibiza, Portugal ou os Picos de Europa.
«Entre o señor Dorado e eu non hai nin unha amizade estreita nin ancha, nin unha relación directa, coñézoo a través dun compañeiro da Xunta de Galicia. Cando o coñecín non sabía da súa actividade nin nada», manifestou Feijóo ante os medios de comunicación cando o retrato saíu á luz. Dorado dixo que si o consideraba o seu amigo, e que, nese momento, o presidente «non estaba a falar co corazón senón co cerebro de político».
Na entrevista con Évole de hai dous anos, Feijóo conta que descoñecía os asuntos de Dorado aínda cando o arousán ocupou múltiples portadas de xornais galegos nunha época sinalada para o narcotráfico na comunidade, cando os grandes do contrabando de tabaco se pasaron á cocaína: «Vostede cre que se eu soubese isto… que gañaba eu», dixo Feijóo. Dorado percibiu a actuación do presidente e alegou: «Empáchase dunha maneira… Non soubo saír, púxose moi nervioso e non tiña por que». Cre que Feijóo non ten que arrepentirse, porque «nunca» falaron da súa actividade, asegura que «xamais» fixeron negocios e que non financiou ao PP galego con eles.
Aínda que o presidente lle reste importancia cada vez que os medios preguntan sobre a súa relación con Dorado, as contradicións tras a versión achegada na entrevista descobren que aínda queda moito por saber e que a verdade se descoñece. O presidiario asegura que a última vez que falou con Feijóo foi ao redor do 2000, con todo, o barón galego declarou ante os medios de comunicación que foi en 1997 cando rompeu relación, tras coñecer a actividade do seu compañeiro penado pola Xustiza.
O condenado conta a Jordi Évole que ao redor de 2000 ou 2001 deixan de ser amigos e que é el o que decide distanciarse porque Feijóo «está moito en política». A última vez que se viron, segundo a versión do arousán, é o actual presidente quen o chama porque «é empresario» e quedaron. Agora, se o líder do PP galego entrase pola porta e se atopase con el, Dorado di que o «entendería» e que Feijóo «escaparía».
Considera que as fotos saíron para «queimar» a imaxe do mandatario autonómico sendo el «o sacrificado». Conta que foi condenado para «danar» a Feijóo e que cando as imaxes se publicaron denegáronlle os permisos penais. Segundo el, a foto tardou tantos anos en saír porque había que esperar a que estivese imputado para poder dicir «Feijóo, amigo dun narcotraficante».
Dorado revela que tivo visitas de ministros «mandados» do PP de Madrid para «lanzar merda» sobre Mariano Rajoy e Feijóo. Así mesmo, relata que, en 2005, por un recado dun ministro do PSOE, fixéronlle chegar que se facía unhas determinadas declaracións apartaríano do cárcere.
Na actualidade, o pontevedrés arrepíntese de venderlle un barco a Roberto Leiro, o mesmo onde se atoparon 6 toneladas de cocaína e polo que foi procesado. Dorado, segundo conta, está «en contra» do narcotráfico, e cre que todo é unha «vendetta», unha «trampa». Pensa que hai unha man negra detrás e que queren condenalo desde hai moitos anos. Sostén que todos os millóns en Suíza e paraísos fiscais «non son unha barbaridade» e que proveñen de negocios legais.
No caso de que poida votar nas próximas eleccións autonómicas, apostará por Feijóo. «Terei que votar ao que non é o meu amigo», responde a Évole, e recoñece que de haber outro candidato «coa honradez» do barón galego, o votaría. Despois de todo, ten claro que Feijóo era o «destinatario» do seu «lixo» e que desexa ser lembrado como «o fillo de Ramona», o que se foi á Illa de Arousa con sete anos.
![](https://luzes.gal/wp-content/uploads/2022/12/banner-libros.gif")
