A Coruña.- A sala do Penal do Tribunal Supremo ten sinalado para este luns a vista oral contra o senador do PP Manuel Baltar, acusado dun delito contra a seguridade viaria por conducir o Volkswagen Passat oficial da Deputación a 215 quilómetros por hora en abril de 2023.

O xuízo revive as prácticas corruptas do PP en Ourense, que Baltar e a súa familia dominaron durante case trinta anos, incluídos os trece que Alberto Núñez Feijóo estivo ao mando da Xunta e do partido en Galicia.

O entón presidente da Deputación Provincial foi cazado por un radar o 23 de abril de 2023 circulando na A-52 á altura de Zamora 95 quilómetros por hora por encima do límite legal. Os axentes da Dirección Xeral de Tráfico parárono, identificárono e denunciárono. Uns 50 minutos antes e na mesma vía, outro cinemómetro detectara ao mesmo coche a 173 km/h.

O xuíz sinalou xuízo rápido inmediatamente, pero Baltar deulle plantón por dúas veces. De feito, logrou eludir a vista cando Feijóo e Alfonso Rueda decidiron que fose nomeado senador por designación autonómica poucos meses despois a cambio de que renunciase á Deputación.

Aforado grazas a Feijóo e Rueda

Desa forma, Baltar, logrou a condición de aforado e o correspondente traslado da súa causa ao Tribunal Supremo, que tivo que solicitar ao Senado un suplicatorio para, finalmente, e a diferenza do que lle pasa a calquera cidadán, proceder a xulgalo case dous anos despois da infracción.

A Deputación Provincial, que agora dirixe o seu compañeiro de partido Luis Menor, seguiu pagando outras sancións por exceso de velocidade correspondentes ao mesmo coche, ao triplo da súa contía inicial, tras negarse a institución para identificalo como o seu condutor.

Tamén tentou modificar a relación de postos de traballo do organismo para nomear xefe do parque móbil ao exchófer de Baltar, e orzou gratificacións para o persoal de confianza deste, que xa lles abonou 55.000 euros antes de deixar o seu cargo.

Baltar herdou a Deputación e a presidencia do PP provincial do seu pai, José Luis, que acaba de cumprir unha condena de nove anos de inhabilitación por enchufar na institución a máis de 100 simpatizantes do partido.

Durante anos, e como desvelou Luzes-Público a primavera pasada, Baltar pai vendeu postos de traballo na Deputación que presidía a cambio de diñeiro e de onerosos agasallos en metálico, como un Rolls Royce para a súa colección particular de vehículos clásicos.

Máis multas

O seu fillo tamén deixou a presidencia do organismo no medio de numerosos escándalos. Luzes-Público sacara a luz en 2023, o luxoso parque móbil do que dotou á Deputación acumulaba decenas de sancións por exceso de velocidade, de moitas das cales se responsabilizou a familiares de empregados públicos. Unha delas, a filla da súa entón condutor persoal, obtivo unha praza de funcionaria poucas semanas despois de que ela e a súa nai asumisen unha desas sancións.

Ademais, este medio publicou os gastos que ese chofer pagou con diñeiro da Deputación agasallos persoais, doces e obxectos variados, incluído un balón de balonmán, ademais de comidas e ceas do presidente fóra do exercicio do seu cargo. Luzes-Público tamén desvelou os audios nos que o seu irmán admitía que ambos cobraban mordidas aos construtores adxudicatarios de obras da institución.

O PP non informou das medidas que adoptará se Baltar resulta condenado por un delito contra a seguridade viaria, polo que o fiscal lle pide un ano e un día de privación do dereito para conducir e unha multa de 1.800 euros.

Os estatutos do partido consideran infracción moi grave dos seus cargos e afiliados a condena por un delito «que pola súa natureza ou polas circunstancias nas que se cometeu se considere incompatible coas obrigacións e deberes éticos» esixibles á súa militancia, e susceptible de ser castigado con suspensión de entre catro e seis anos e inhabilitación para desempeñar cargos orgánicos ou de representación polo mesmo período.