A Coruña.- A dirección do PSdeG decidiu prescindir da metade do seu grupo no Parlamento de Galicia nas listas para as eleccións autonómicas do 18 de febreiro, das que foron excluídos as deputadas e deputados afíns ao anterior secretario xeral, Gonzalo Caballero.

Fontes dese sector, do que forman parte sete dos 14 membros do actual grupo do PSdeG na Cámara galega, atribúeno a unha «manobra sectaria» da que responsabilizan a José Manuel Lage Tuñas, secretario de organización da executiva de Valentín González Formoso.

En concreto, os socialistas de Galicia anunciaron a través dos medios locais e autonómicos que non estarán nas listas o propio Caballero e os ata o de agora deputados Pablo Arangüena, Eduardo Ojea, Noa Díaz e Noelia Otero.

Tamén prescindiron de Martín Seco, exsecretario local en Arteixo (A Coruña) a quen a executiva de González Formoso abriu hai ano e medio un polémico expediente de expulsión que aínda non se ten resolto; e a exdiputada no Congreso e deputada autonómica por Ourense Marina Ortega.

Adeus á candidata máis votada en Ourense

No caso desta última, a dirección provincial do partido propuxéraa como número uno da candidatura ourensá, tomando os resultados das asembleas locais do partido. Quen encabezará a lista, con todo, será, segundo fonte da executiva galega, Carmen Dacosta, a quen esas mesmas asembleas relegaran ao quinto posto.

O luns tamén se soubo que a alcaldesa de Lugo, Lara Méndez, irá de número dous na lista por esa provincia tras o candidato á Xunta, José Ramón Gómez Besteiro.

A dirección rexional de Formoso si respectou a decisión da executiva provincial da Coruña, dominada polo sector afín a Lage Tuñas  para os números uno, dous e tres: Patricia Iglesias, Julio Abalde e Silvia Longueira.

En Pontevedra a candidatura encabezaraa a exministra de Agricultura e Pesca Elena Espinosa, seguida de Carlos Font, portavoz do Goberno municipal de Vigo que preside Abel Caballero.

Caballero renuncia á lista de Pontevedra

Segundo puido saber Luzes-Público, a executiva de Pontevedra, en mans do alcalde de Vigo, ofrecería ao seu sobriño, Gonzalo Caballero, propoñelo como número un pola provincia.

Diante da intención da dirección autonómica de relegalo ao segundo ou ao terceiro posto, o exsecretario xeral preferiría non aceptar, tal e como expresou o pasado luns na súa conta de X, asumindo positivamente a formulación deBesteiro, de que as listas da Coruña, Ourense e Pontevedra as encabezasen mulleres.

A dirección de González Formoso e Lage non explicou en cambio por que prescindiu de Marina Ortega, a muller preferida polas bases e proposta para encabeza a candidatura pola dirección provincial de Ourense.

«Están a dividir en dous ao partido no momento en que a unidade resulta máis necesaria», engaden as citadas fontes.

Non é a primeira vez no pasado recente en que iso sucede no partido nesa provincia.

Para as municipais do pasado maio, a executiva do PSdeG decidiu suspender as primarias locais na capital sen máis explicación para evitar que as gañase o hoxe senador Rafael Rodríguez Villarino, quen gañara os anteriores comicios e exercía a portavocía no Concello como xefe da oposición a Gonzalo Pérez Jácome.

No seu posto foi o exalcalde Francisco Rodríguez, que perdeu un 7% de votos con respecto aos que obtivera Rodríguez Villarino en 2019.

Lage tamén desautorizou a Rodríguez Villarino como aspirante á presidencia da Deputación de Ourense tras a caída de Manuel Baltar. O secretario de organización asumiu en persoa as negociacións con Jácome, que non frutificaron, polo que este acabou pactando co PP.

Nas xerais do 23J, o PSOE perdeu 2.000 votos -un 3%- en Ourense que lle custaron outro deputado no Congreso.