A Coruña.- A oposición galega afeou o mércores ao presidente da Xunta, Alfonso Rueda, que decidise eliminar a tarxeta básica de alimentos que permitía a 35.000 familias vulnerables da comunidade adquirir bens de subsistencia, á vez que rebaixa ao 50% o imposto sobre o patrimonio a 7.700 grandes fortunas que aforrarán así 35 millóns de euros.
«É vostede un Robin Hood ao revés», criticou a portavoz nacional do BNG, Ana Pontón: «Cunha man quita a Tarxeta Básica a quen máis a necesitan e coa outra regálalles 34 millóns de euros aos máis ricos».
A polémica suscitouse durante o debate sobre os orzamentos xerais da comunidade autónoma, que Pontón cualificou de «propagandísticos», «insolidarios» e «insolventes» porque, ao seu xuízo, se basean en datos «falsos». Nese sentido, lembrou que un recente informe do servizo de estudos do BBVA augura un crecemento do 0% en Galicia, «o peor de todo o Estado», dixo Pontón.
O socialista Luís Álvarez lembrou, pola súa banda, que a cantidade que a Xunta deixará de gastar nas axudas para a alimentación das familias necesitadas que se puxeron en marcha durante a Covid –e finiquitadas agora, a pesar de que a oposición pediu prorrogar para apoiar os cidadáns en situación de necesidade pola crise da enerxía e a alza dos prezos–, representa 30 millóns de euros. É dicir, unha cantidade moi próxima aos ingresos aos que a Xunta renuncia para beneficiar ás 7.700 maiores fortunas de Galicia.
Álvarez insistiu en reclamar á Xunta que rectifique porque, asegurou, dispón de recursos, e porque non ten sentido «axudar a quen non teñen ningún problema para encher a cesta da compra».
Rueda non quixo explicar por que retiraba axudas aos pobres á vez que as decreta para os máis ricos, e defendeu que a súa baixada de impostos ás rendas altas permite «que a xente teña máis diñeiro e poida ir á compra». Tamén asegurou que o seu proxecto de orzamentos destina o 75% do investimento «a gasto social e sanitario».
Nese sentido, Pontón reprochoulle a «propaganda» do seu discurso ao advertir de que, descontado o efecto derivado do incremento da inflación nos últimos 13 anos, o orzamento destinado á Atención Primaria en 2023 será menor que o que proxectou para 2009 o goberno anterior a Feijóo.
