A Coruña.- Os partidos galegos entraron este luns en modo electoral coa celebración da primeira xornada do debate sobre política xeral, é dicir o debate o estado da autonomía, que terá a súa segunda sesión o vindeiro mércores coa votación das propostas de PP, BNG e PSOE, as tres formacións con representación na Cámara.
O presidente da Xunta, Alfonso Rueda (PP), mantivo a estratexia preelectoral que iniciou hai semanas, con máis promesas de axudas e subvencións dirixidas especificamente aos tramos de idade do electorado no que o PP tenta pescar votos.
As autonómicas galegas están previstas para xullo do ano que vén, pero Rueda barallaba desde hai meses adiantalas en función do que ocorrese na política estatal.
Unha vez fracasada a investidura de Alberto Núñez Feijóo e sen o acompañamento da onda no seu favor que representaría a súa imaxe na Moncloa, o herdeiro en Galicia do presidente do PP espera agora a saber que pasa coa de Pedro Sánchez para tomar unha decisión.
Febreiro ou marzo
Segundo fontes do PP, todo apunta a que, se Sánchez consegue formar Goberno e non se repiten as eleccións xerais, os comicios autonómicos poderían celebrarse en febreiro ou en marzo de 2024.
Durante o seu discurso, Rueda, que herdou o seu cargo de Feijóo sen referendalo ata o de agora nas urnas, defendeu a «estabilidade» que ao seu xuízo transmitiu o seu Goberno a Galicia e instou a continuar na mesma liña para «seguir avanzando» sen «caer no conformismo».
Ademais, profundou no rosario de promesas electorais en forma de axudas e rebaixas fiscais que leva debullando desde hai semanas e engadiu algunhas novas: unha subvención anual de 5.000 euros para as familias con dependentes a cargo; un carné para maiores de 65 anos para beneficiar con descontos aos maiores; unha redución ao 8% no imposto de transmisións patrimoniais; un fondo de 300 millóns de euros para investimentos en «proxectos estratéxicos»; un plan para construír 1.900 vivendas públicas en alugueiro…
A portavoz nacional do BNG e líder da oposición, Ana Pontón, a única candidata á que as enquisas auguran polo momento a posibilidade de disputarlle a Rueda a Presidencia da Xunta, considerou «un engano» e «un insulto á intelixencia dos galegos e as galegas» que Rueda pretenda facer crer ao electorado «que vai facer agora o que o PP non fixo en 14 anos».
«Promesas e propaganda» dun Goberno «desnortado», «antigalego», «sen proxecto de país» e «sen nada que ofrecer máis aló de receitas fracasadas e a submisión aos intereses do PP de Madrid», dixo a portavoz nacionalista, quen denunciou que a Xunta de Feijóo e Rueda funcionou como «unha trituradora»: das esperanza da mocidade, da sanidade, a educación, a economía, o emprego, o medio ambiente, o territorio, o idioma…
Unha maioría social «que quere cambio»
Fronte a esa «Galicia pequena que deixa o PP», dixo Pontón , existe «unha maioría social que quere cambio» á que o BNG ofrece «un proxecto sólido e de futuro» para «construír unha Galicia en grande».
«Fronte a Galicia pequena que deixa o PP, hai unha maioría social que quere cambio»
Pola súa banda, o portavoz socialista na Cámara galega, Luis Álvarez lamentou que Rueda viva, na súa opinión, na «irrealidade», e criticouno por iniciar o seu discurso falando de política nacional -a amnistía, os pactos do PSOE con partidos independentistas, etcétera-, coma se non tivese un proxecto para Galicia máis aló de acatar o discurso do PP en Madrid.
Álvarez actúa como líder do PSdeG no Parlamento porque o secretario xeral do seu partido, Valentín González Formoso, non forma parte del. En certa forma, o seu discurso quedou eclipsado polo anuncio de Xosé Ramón Gómez Besteiro, exlíder do partido, exdelegado do Goberno en Galicia e deputado no Congreso por Lugo, de que se presentará ás primarias para elixir ao cabeza de cartel socialista á Xunta.
Confianza de Pedro Sánchez
Besteiro é unha das persoas de confianza de Pedro Sánchez -elixiuno como un dos negociadores para solicitar os apoios para a súa investidura-, e o anuncio da súa decisión podería dar pé a que a contorna do tamén exsecretario xeral do PSdeG Gonzalo Caballero se expoña a presentar un candidato alternativo a Besteiro nas primarias.
Presente onte no hemiciclo desde a tribuna de visitantes, Besteiro manifestou que en Galicia avístase «un cambio» que el pretende protagonizar cun proxecto «aberto á sociedade», e adiantou críticas a Rueda por contribuír a que o PP galego se pechase «en si mesmo» para «botar a culpa aos demais e non asumir responsabilidades propias».
De feito, boa parte da intervención no debate do portavoz do PP, Xosé Alberto Pazos, estivo destinada a cuestionar o traballo do Executivo bipartito de PSOE e BNG que gobernou o país entre 2004 e 2009.
Xunto aos tres partidos que forman parte do Parlamento galego, as enquisas tamén outorgan a Sumar a posibilidade de entrar na Cámara nas próximas autonómicas. Aínda que a formación de Yolanda Díaz aínda non designou candidata, a súa deputada no Congreso por Pontevedra, Verónica Barbero, exerceu de portavoz para manifestar a través dun comunicado que o discurso de Rueda fora «un disparate afastado da realidade» e augurar que o candidato popular perderá os comicios «como perdeu Feijóo no Estado».
