A Coruña.- O alcalde de Ourense, Gonzalo Pérez Jácome, asegurou este mércores que os audios que recollen conversacións no seu despacho nos que fala cos seus colaboradores de mordidas e comisións, concesións amañadas, manexo e branqueo de diñeiro negro e manobras para desfacerse de multas de circulación, son falsos, están manipulados e responden a unha campaña de espionaxe ilegal para evitar que repita na Alcaldía.

Nervioso, histriónico e crispado, falando de corrido durante máis dunha hora seguida no salón de plenos do Concello, empregando unha linguaxe vulgar e en ocasións insultante e agresiva, o rexedor protagonizou outra atípica rolda de prensa na que zafou de calquera explicación que lle reclamaron os xornalistas. Escudouse na primeira tese -as gravacións son ilegais e falsas, obra dunha mafia que implica a empresas, medios de comunicación e partidos políticos-, e recorreu a circunloquios, chistes malos, anécdotas fóra de lugar e lugares comúns para, en definitiva, non ofrecer aclaración ningunha.

«As eleccións [municipais do 28M] convertéronse nun plebiscito entre os que roubaron e queren roubar o diñeiro do Concello, e Democracia Ourensá [DO, o seu partido], que llo impediu», dixo Jácome, quen advertiu que Ourense «é unha terra de caciques». Mesmo chegou a comparar o seu caso, salvando todas as distancias, co Watergate ocorrido en Estados Unidos a principios dos anos setenta.

Mordidas a través da canle de televisión do alcalde

No último dos audios, publicado este mércores polo diario local La Región, escóitase ao alcalde idear un plan para obter dun empresario interesado nunha concesión 22.000 euros para financiar a campaña electoral de DO, 12.000 dos cales se facturarían como supostos pagos por insercións publicitarias en Auria, a empresa que xestiona a canle de televisión propiedade do rexedor, e o resto en diñeiro B.

«Imos falar de diñeiro aquí con confianza (…) De todo, de diñeiro negro ou o que faga falta»

«Fala, que imos falar de diñeiro aquí con confianza (…) De todo, de diñeiro negro ou o que faga falta», di Jácome. O seu interlocutor respóndelle: «Perfecto. Mira, el mandouche un correo para que en B…, para que en A, fagas en publicidade na tele 1.000 euros ao mes, durante o primeiro ano xa desde hoxe. E despois en B (…). E despois, se sae o tema dos autobuses [a concesión do servizo de transporte público]… Díxome que fai un advisor e fai unha iguala duns 3.000 euros mensuais ao mes en publicidade. … E despois… Iso en publicidade, posto ao mes en publicidade».

O alcalde, cuxa familia xestiona unha tenda de artigos musicais onde algúns dos seus falsos asesores declararon á policía que tamén lle entregaban diñeiro negro como mordidas aos seus soldos no Concello, asegurou ser un experto en son. Na súa versión, os audios que lle implican en prácticas corruptas son unha mestura de conversacións reais descontextualizadas e falseadas mediante intelixencia artificial, editadas posteriormente por expertos na materia para modificar o seu contido co emprego de técnicas de última xeración. «Calculo que lles custará entre 200.000 e 300.000 euros, esta xente só traballa con profesionais», espetou.

Unha mafia de partidos, empresas e medios de comunicación

Na súa opinión, eses expertos estarían ao servizo dunha «mafia» que incluiríaa La Región, á que asegurou que o Concello lle tiña «cortada a billa» das axudas públicas municipais; á empresa construtora e subministradora de servizos Copasa, á que negaría as concesións dos servizos municipais de augas, transporte e recollida e tratamento de residuos; e aos partidos políticos, especialmente PSOE e PP, sobre, todo «o PP», dixo, a formación grazas a cuxo apoio pode gobernar Ourense con só catro dos 27 concelleiros do Concello, a cambio dos seus votos na Deputación Provincial para que esta poida seguir presidida por Manuel Baltar.

«Esta é unha terra de caciques»

Jácome asegurou sen probas que os audios proveñen dun micrófono oculto no seu despacho na Alcaldía e non dunha gravadora ou un teléfono móbil dos seus interlocutores ou colaboradores, o que anularía calquera percorrido legal nunha denuncia contra el, como a que o BNG presentou o mércores pola mañá na Fiscalía. Ese micro gravaría, segundo afirmou sen achegar tampouco proba algunha que documentase a súa afirmación, máis de 60.000 minutos de conversacións «privadas, con cousas persoais, intimidades ou de negocios». «É un acto de espionaxe moi grave», dixo.

O alcalde explicou que se decatou da publicación das gravacións a noite do pasado venres, cando estaba nun concerto e un asesor chamouno para contarllo. «A nai que me pariu! Puxeron un micrófono na Alcaldía!», foi a súa primeira reacción. Logo, engadiu que a última das conversacións publicadas por La Región ocorrera hai só tres semanas, o que supoñería que o suposto micrófono sería retirado nalgún momento desde esa data. «Tamén é culpa miña, porque aquí [na Alcaldía] anda todo o mundo como Perico pola súa casa».

Tras o seu discurso inicial, que durou máis dunha hora, Jácome deu paso aos xornalistas, que tentaron preguntarlle sen éxito polo contido dos audios. Interrompeunos e rebateunos constantemente, no seu estilo, para evitar dar explicacións sobre o mesmo.

«O diaño é malísimo, pero eu pactarei co diaño se consigo o ceo para Ourense».

O único que respondeu con claridade foi cando lle interrogaron sobre a posibilidade de repetir alianza co PP e con Baltar tras o 28M, a pesar da insinuación que acababa de facer de que ese partido estaba detrás da filtración das gravacións e das «prácticas mafiosas» que denunciaba: «O diaño é malísimo, pero eu pactarei co diaño se consigo o ceo para Ourense».