A inconsistencia do discurso de Feijóo sobre o aforro enerxético debilita a súa posición no PP

As contradicións do líder do Partido Popular provocan que as comunidades populares ofrezan discursos dispares sobre as medidas do Goberno, desde o «Madrid non se apaga» de Ayuso ao «consenso» de Rueda para algo que «todos poidan cumprir»

A Coruña.- A inconsistencia e as contradicións das críticas de Alberto Núñez Feijóo ao plan de aforro enerxético do Goberno están a debilitar a súa posición con respecto á dos baróns e líderes das comunidades onde goberna o Partido Popular.

Madrid, Andalucía, Galicia, Murcia e Castela e León saíron en tromba con propostas alternativas diferentes entre si e con respecto ao discurso do presidente do PP. Dá a impresión de que o partido non ten unha posición única con respecto a como cumprir a decisión dos gobernos de toda a Unión Europea (UE) de reducir un 15% o consumo de gas pola ameaza de Rusia de cortar a subministración a Europa.

O pasado 20 de xullo, de visita en Valencia, Feijóo instou o Executivo a poñer en marcha un programa de aforro de enerxía. «Debemos baixar o consumo enerxético innecesario e pactar con concellos un aforro en iluminación eléctrica nocturno para prepararnos para cortes ou diminucións de enerxía», dixo literalmente.

Seis días despois, o Consello de Ministros de Enerxía da UE alcanzou un acordo político de redución voluntaria da demanda de gas natural do 15 % entre o 1 de agosto de 2022 e o 31 de marzo de 2023, e acordou tamén a posibilidade de establecer un obxectivo de redución de demanda vinculante para cada país.

O 1 de agosto, só cinco días despois do pacto europeo, o executivo español aprobou o real decreto co plan de aforro, que incluía medidas como as que Feijóo propuxera. Lonxe de celebrar que o Goberno lle fixera caso, o presidente do PP optou polo silencio cando a presidenta da Comunidade de Madrid, Isabel Díaz Ayuso, dixo que non pensaba cumprilas.

«Madrid non se apaga», advertiu Díaz Ayuso, sen que Feijóo se atrevera a contradicila nin a dicir se lle parecía ben ou mal que a xefa do goberno madrileño anunciase en ton épico a súa intención de vulnerar unha lei estatal.

O pasado domingo, un día antes da reunión extraordinaria de conselleiros de Medio Ambiente convocada polo Executivo para detallar o contido do real decreto, e mentres participaba na Feira do Albariño de Cambados (Pontevedra), Feijóo volveu referirse a el. «Propoñer as mesmas temperaturas a un comercio de conxelados que a unha librería, unha tenda de froitas ou unha tenda de roupa é simplemente unha improvisación».

Ayuso e Feijóo, nunha imaxe de arquivo / Foto: Comunidade de Madrid.

O certo é que esa afirmación non é certa, posto que o decreto contempla límites de temperaturas distintas para locais e negocios con actividades diferentes: «Non terán que cumprir as limitacións de temperatura aqueles recintos que xustifiquen a necesidade de manter condicións ambientais especiais ou dispoñan dunha normativa específica que así o estableza». Así figura no artigo 29.1.c) do decreto.

As declaracións de Feijóo o domingo non achegaban ningunha proposta alternativa ás medidas do goberno nin aventuraban indicio algún dunha posición común no PP máis aló de ofrecer «diálogo» e reclamar unha Conferencia de Presidentes autonómicos para tratar o asunto. Así que cada conselleiro do PP chegou á reunión do luns co seu propio guión.

Andalucía pediu retirar non todo o decreto, senón só as medidas do Capítulo I do Título V –«Fomento do aforro e a eficiencia enerxética»–, propuxo non incidir tanto nas imposicións e sancións ás empresas senón en máis «incentivos e recomendacións», e advertiu que calquera estratexia de redución do consumo debe ter en conta a «idiosincrasia» da comunidade.

Niso coincidiu con Murcia, que avogou por que sexan os técnicos «os que fixen criterios como a temperatura, dependendo da actividade empresarial e a situación territorial», pero non con Madrid, cuxo goberno anunciou que recorrerá o real decreto no Tribunal Constitucional, aínda que non polo seu contido, senón por, presuntamente, invadir competencias autonómicas. A conselleira de Medio Ambiente de Ayuso tampouco aclarou se recorrerá só o Capítulo I do Título V, do que se queixan Murcia e Andalucía, ou toda a lei.

No caso de Castela e León, o seu representante instou tamén a promover incentivos no canto de sancións en materia de aforro enerxético, pero engadiu como nova proposta «apoiar as industrias electrointensivas», é dicir, as que máis enerxía consomen.

A parte popular do Executivo de Alfonso Fernández Mañueco non se pronunciou sobre a intención do seu socio, Vox, de propoñer un plan de soberanía enerxética para as dúas rexións «exento de toda imposición climática por parte de organismos supranacionais». É dicir, entre elas a Unión Europea. Vox tamén propón derrogar todas as leis contra o cambio climático e as súas consecuencias que, ao seu xuízo, «hipotecaron» a produción enerxética, e, como Ayuso, recorrer o real decreto no Tribunal Constitucional.

Nin o PP castelán-leonés nin Feijóo se pronuncian sobre se apoian ou non esa iniciativa. Tampouco o sucesor do líder popular en Galicia, Alfonso Rueda, quen o que defende é celebrar unha Conferencia de Presidentes sobre o plan de aforro, como o seu predecesor. A medio camiño entre a postura de Ayuso e de Feijóo, Rueda animou a acordar «un texto o máis operativo e eficaz posible para que todos» poidan cumprilo.

cool good eh love2 cute confused notgood numb disgusting fail