A información sobre a multitudinaria marcha en Santiago contra o uso partidista da CRTVG a favor do PP emitiuse sen declaracións nunha cola ao final do informativo de mediodía e apenas ocupou 20 segundos no da Radio Galega.

A Coruña.- Os servizos informativos da Televisión de Galicia camuflaron o pasado domingo a noticia da multitudinaria protesta contra a manipulación informativa dos medios públicos galegos celebrada en Santiago cun corte de imaxes locutadas de apenas 35 segundos ao final do telexornal de mediodía, sen dar oportunidade aos convocantes de expresar as súas reivindicacións e mesturándoa con outros breves sobre conflitividade laboral.

No Telexornal mediodía fin de semana, de máis de media hora de duración, a protesta convocada polo comité de empresa da Corporación de Radio e Televisión de Galicia (CRTVG), á que asistiron varios miles de persoas na capital galega, segundo os medios locais, non figurou nos titulares. O tema ocupou o posto 16 da escaleta de 22 noticias emitidas o domingo.

O informativo da fin de semana abriu en titulares cun atropelo mortal intencionado en Torrexón de Ardoz (Madrid); unhas declaracións do conselleiro de Sanidade da Xunta sobre a gripe, acompañada dunha glosa sobre os bos datos de vacinación contra esa enfermidade e contra o covid-19 en Galicia; a alerta laranxa por ondas e vento no litoral da Coruña; a detención de tres persoas por roubo; a desaparición dun enfermo de alzhéimer nunha aldea de Ourense; o caso dun veciño de Betanzos (A Coruña) quen, a pesar de estar vivo, consta como morto nos rexistros do DNI; e o accidente dun avión de pasaxeiros en Tanzania.

A noticia da manifestación contra a manipulación na CRTVG ocupou no informativo da propia casa pouco máis de medio minuto ao final dun grupo de noticias breves ou colas relacionadas coas convocatorias de folga en Renfe, en Vueling e no sector do transporte e cunha manifestación das dependentas de Inditex en demanda de condicións e salarios dignos.

A protesta dos traballadores da CRTVG, que non tiña carácter laboral, senón reivindicativo da súa «dignidade profesional», apareceu ao final deses breves, sen que se recollese o testemuño de ningún dos seus representantes nin de ningún participante para que puidese dar a súa versión sobre o acto, do que tampouco se ofreceu información sobre o comunicado final, crítico coa dirección da compañía.

Varios traballadores da CRTVG confirmaron a Luzes-Público que a información da manifestación «non foi asignada a ningún redactor raso na escaleta», o que, ao seu xuízo, quere dicir «que foi cociñada directamente polos reponsables dos informativos».

A dirección da CRTVG negou a Luzes-Público que censurase a información sobre a protesta contra a manipulación, limitándose a enviar unha ligazón ao vídeo do informativo, que pode verse neste link a partir do minuto 29:05, e desde o que tamén pode accederse á escaleta completa do Telexornal.

Os representantes dos traballadores, pola contra, advirten de que o formato de emisión da noticia, sen entrevistas, testemuños nin reaccións, o escaso tempo que se lle dedicou, a súa «camuflaxe» entre informacións sobre outros conflitos laborais e o feito de que fose presumiblemente redactada pola dirección, pretendía minimizar o impacto da convocatoria, o que representa, ao seu xuízo, un exemplo máis da manipulación e da intención de «confundir e intoxicar» á audiencia por parte da dirección da CRTVG que a protesta pretendía denunciar.

Esa tese apóiase tamén no feito de que o locutor do informativo de mediodía da Radio Galega (RG), que dura 30 minutos, apenas dedicou 20 segundos á protesta dos seus compañeiros, lendo de corrido, como pode escoitarse nesta ligazón para partir do minuto 25:05, un texto idéntico ao que acompañou ao medio minuto de imaxes na TVG. O que parece evidenciar, afirman os traballadores, que ambas informacións, a da radio e a da televisión públicas, foron redactadas pola mesma ou as mesmas persoas, a pesar de que os dous medios contan coas súas propias redaccións, separadas física e orgánicamente, e de que contan cos seus propios xefes e equipos de informativos.

Engaden, ademais, que tras eses 20 segundos de lectura «plana» o locutor da RG dedicou outros 25 segundos a informar, esta vez coas inflexións e entoación habituais dun profesional de informativos, unha noticia beneficiosa para os intereses da dirección: a CRTVG recibira o distintivo Ardán, co que o Consorcio Zona Franca de Vigo distingue a aquelas empresas «que presentan altos valores de igualdade desde unha perspectiva de xénero no ámbito laboral». En realidade, esa noticia era de dous días antes, tal e como recolleu o venres pasado a web da CRTVG. Para os traballadores, a súa emisión o domingo só pretendía, de novo, restar impacto ao seu acto de protesta e, de novo, «enganar» os oíntes da RG.

O comité de empresa dos medios públicos levaba semanas preparando a protesta baixo o lema «Por unha CRTVG ao servizo do pobo, rescatémola!», e mesmo denunciaron represalias e presións aos delegados sindicais que a promocionaron.

Apoiábana medio centenar de organizacións de todo tipo encabezadas por Defende a Galega, a plataforma que desde fai catro anos e medio convoca os Venres negros en defensa da información veraz e polo cumprimento da lei galega que regula o funcionamento dos medios públicos.

Uníronse a ela asociacións feministas, ecoloxistas, de defensa da sanidade e a educación públicas, do idioma galego e do dereitos LGTBI+, ademais de asociacións de escritores, artistas, músicos, actores, cineastas e escenógrafos, así como os principais sindicatos e os partidos da oposición.

Nos últimos 17 anos, a CRTVG perdeu ao redor de 400 sentenzas por vulneración de dereitos laborais e fundamentais. Só no último ano, os xuíces fallaron en 18 ocasións en contra de polémicas decisións da dirección.

Neste tempo, os tribunais fallaron contra a dirección por vulnerar desde o exercicio do dereito de folga ao dereito á conciliación, á non discriminación por razón de xénero e á libre expresión de ideas, e mesmo por violar a neutralidade política en plena campaña electoral, entre outras.

A última delas, a condena firme por vulnerar o dereito fundamental á liberdade de expresión do xornalista Carlos Jiménez, que foi perseguido, expedientado e sancionado ilegalmente por un chío no que se posicionou a favor de Defende a Galega.

A dirección tamén recibiu críticas pola emisión de contidos sexistas, machistas ou promotores da violencia contra as mulleres, e por increpar a concursantes dos seus programas por denunciar a manipulación e reclamar uns servizos informativos independentes do poder político.

O director da CRTVG é Alfonso Sánchez Izquierdo, nomeado por Alberto Núñez Feijóo nada máis chegar ao poder no 2009, e quen se mantén no cargo a pesar de que unha lei galega do 2011 establece que o seu cargo debe ser elixido co apoio de polo menos dous terzos dos deputados do Parlamento de Galicia, onde o PP nunca contou con escanos suficientes para alcanzar esa maioría.