A Coruña.- As listas de espera na sanidade pública volveron aumentar en Galicia segundo rexistran os últimos datos que ofreceu o Servizo Galego de Saúde (Sergas) e que se refiren ao segundo semestre de 2022. Nalgúns hospitais, os pacientes deben esperar unha media de máis de 380 días, é dicir máis dun ano, para unha proba diagnóstica. Trátase dunha media, o que significa que hai enfermos que superan esa demora.

O Sergas solicita eses datos con carácter semestral, e as cifras ao 31 de decembro do ano pasado tamén indican que as listas de espera seguen sendo considerablemente superiores e máis duradeiras con respecto ao último semestre de 2019, antes da pandemia de covid e do colapso que provocou a emerxencia sanitaria.

Superada esta, con todo, máis de 215.000 persoas esperan na comunidade, sobre unha poboación de 2,6 millóns de habitantes, a que os atenda un especialista. En xuño de 2022 eran 198.000, e en decembro de 2019, 167.000. Hoxe teñen que agardar 66 días, fronte aos 55 días de demora da primavera pasada e os 41 días de antes da covid. Un aumento de máis do 60% con respecto a 2019 e de case o 25% sobre o semestre anterior.

Antes da epidemia de covid  66.700 persoas agardaban por unha proba diagnóstica unha media de 60 días, cifras que en xuño de 2022 ascenderon a máis de 92.000 pacientes e 81,5 días, respectivamente. En decembro pasado eran un 91.264 -só un 1,2% menos- pero debían esperar 91,3 días -un 12% máis-.

O número de persoas que necesitan unha intervención cirúrxica tamén se incrementou. Dos 33.000 doentes e 54 días de decembro de 2019 pasouse a máis de 43.000 en xuño de 2022. e 77 días en xuño de 2022. En decembro deste ano esas cifras creceran ata os 46.161 usuarios do Sergas. A espera media pasou dos 54 días de hai catro anos aos 77 da primavera de 2022 e os 75 do inverno dese ano.

230 días para unha cita para rehabilitación en Ourense

Nos hospitais da área sanitaria de Ourense hai que esperar 230 días de media a que te atenda un especialista en rehabilitación. Nos de Lugo son 142 días para ese servizo e 124 para o de cardioloxía. En Ferrol, o anestesista tarda máis de 113 días en recibir aos seus pacientes, e o reumatólogo 109 días en Pontevedra. Os otorrinos de Santiago teñen unha espera media de máis de 80 días, como os oftalmólogos e os neumólogos dos centros do Sergas na área sanitaria da Coruña.

En canto á realización de probas diagnósticas, os enfermos agardan en Lugo máis dun ano e tres semanas -388 días- para unha ecografía de tórax e un ano e dúas semanas -381 días- para un estudo urolóxico. No mesmo hospital son 278 para unha ecocardiografía e máis de seis meses e medio para unha ecografía de mama. Un estudo de soño son 250 días de demora en Santiago e 197 en Ferrol. Na Coruña, unha endoscopia dixestiva tarda unha media de 192 días.

Se o paciente necesita operarse dun traumatismo, a espera media en traumatoloxía rolda os tres meses nos hospitais de Vigo e os catro meses nos da Coruña. Se se trata dunha intervención de uroloxía, son 137 días en Ferrol. En Santiago, o servizo de cirurxía pediátrica tarda unha media de 144 días en operar a nenos e bebés. Unha neurocirugía ten unha espera media de case seis meses en Ourense.

A Xunta defende que as listas de espera de Galicia están entre as máis baixas de España. As asociacións de defensa da sanidade pública, que o pasado mes de febreiro celebraron unha multitudinaria manifestación en Santiago en protesta pola depauperación e privatización da sanidade, alegan que o método do Sergas para contabilizalas falsea as cifras reais.