A Fiscalía abre dilixencias contra Baltar e a Xunta por danar o patrimonio do mosteiro máis antigo de Galicia

Expertos e ecoloxistas denunciaron que o proxecto de ampliación da vía de acceso a San Pedro de Rocas, en Esgos (Ourense), declarado ben de interese cultural, foi falsificado para evitar restricións legais

A Coruña.- A Fiscalía vén de abrir dilixencias penais á Deputación de Ourense e á Xunta de Galicia polas irregularidades detectadas no proxecto de ampliación da vía de acceso ao mosteiro de San Pedro de Rocas, no concello ourensán de Esgos, na Ribeira Sacra. É o mosteiro máis antigo de Galicia e foi declarado Ben de Interese Cultural (BIC) en 1999.

O proxecto de ampliación da estrada está promovido pola Deputación de Ourense e apoiado pola Consellería de Cultura do Goberno de Alberto Núñez Feijóo.

A Fiscalía atende así as denuncias da asociación Amigos da Terra e da Fundación Moreiras San Pedro de Rocas, que alertaron de que desdobrar a vía obrigará a derrubar muros e arquetas do camiño medieval de acceso ao mosteiro, a desmontar un cruceiro tamén declarado BIC e a talar máis de medio cento de árbores.

Ademais, ambas organizacións advertiron de que a Deputación presidida por Manuel Baltar, do PP, falseara na súa documentación técnica o trazado do proxecto, para simular que as obras se ían realizar nun tramo diferente ao que realmente vai ser executado. Sobre ese proxecto baseouse a autorización da Xunta, que en dúas ocasións anteriores rexeitara a ampliación da vía.

San Pedro de Rocas é o emblema arqueolóxico da Ribeira Sacra e un dos conxuntos rupestres máis importantes de España, cunha igrexa excavada na rocha cuxas orixes se remontan ao século XIV.
Fotos coa cara de Baltar na estrada a San Pedro de Rocas.

Segundo a propia Xunta, é un dos templos cristiáns máis antigos que se coñecen. En 1923 foi declarado monumento histórico-artístico nacional, e as cen hectáreas de bosques que o rodean tamén foron declaradas paisaxe de interese cultural, e polo tanto BIC, en 2018.

Segundo puido saber Luzes-Público, o fiscal considera que da actuación da Xunta e da Deputación de Ourense, que xa iniciou as obras, existen indicios dun delito contra o patrimonio histórico, penado con ata tres anos de prisión polo Código Penal.

Amigos da Terra lembrou esta mañá nun comunicado que é unha obriga das administracións públicas «defender o conxunto dos bens patrimoniais (arqueolóxicos, históricso, monumentais, xeolóxicos, a paisaxe, a biodiversidade…) de San Pedro de Rocas».

«O conxunto do Couto de Rocas é o espazo de máis valor da Ribeira Sacra, un dos conxuntos patrimoniais de máis valor de Galicia, polo que a súa correcta protección e conservación é unha obriga de todos e de todas».

«Agardamos que tanto a Deputación de Ourense como a Xunta de Galicia reflexionen e modifiquen o proxecto co fin de conservar os BICs do Couto de San Pedro de Rocas de maneira integral», conclúen.

cool good eh love2 cute confused notgood numb disgusting fail