A Coruña.-  As cargas policiais do pasado domingo en Santiago tras a manifestación en defensa de Palestina que se celebrou ese día na capital galega terminaron con nove persoas feridas polos axentes antidisturbios, que foron ademais detidas e acusadas posteriormente de diversos delitos polos que se enfrontan a varios anos de cárcere.

Trátase da primeira vez que os actos contra o xenocidio en Gaza convocados en España desde a invasión israelí da Franxa hai un ano reciben unha carga represiva similar en violencia e ameazas de prisión á que enfronta o movemento pacifista en países como Estados Unidos, Reino Unido e Alemaña.

En Galicia lévanse celebrando decenas de manifestacións e concentracións a prol de Palestina desde hai 12 meses en numerosas localidades, sen que ata o de agora se rexistrara incidente ningún.

A do domingo, en cambio, que percorreu as rúas de Santiago ata concluír xunto á Catedral e á que asistiron máis de 4.000 persoas na estimación das autoridades locais, estivo custodiada por un dispositivo policial moito mais numeroso que noutras ocasións, segundo aseguraron fontes próximas á organización.

Protesta contra Burger King

Os feitos ocorreron en dous espazos separados e en horas diferentes. Primeiro, sobre as dúas da tarde e unha vez concluída a marcha, a policía detivo cinco persoas despois de que varios manifestantes foran desaloxados dun restaurante da cadea estadounidense Burger King. Acudiran alí en protesta polo apoio que ao seu xuízo presta a multinacional ao xenocidio israelí polos seus donativos ao exército dese país, e en cuxo establecemento do centro de Compostela adoitan celebrar con frecuencia actos pacíficos informativos e de protesta.

Á saída do local, tal e como se observa nun vídeo publicado por Público este luns, varios axentes abalánzanse sobre unha das mulleres, primeiro, e sobre os seus acompañantes, despois, para reducilos a golpes e introducilos logo en varias furgonetas tras algúns escarceos nos que varios policías chegan a escorregar e a caerse uns encima doutros.

O segundo incidente ocorreu horas despois, sobre as 19.30, cando os axentes detiveron catro persoas máis fronte á comisaría da policía nacional en Santiago, onde se concentraron unha vintena de manifestantes en apoio dos seus compañeiros detidos.

Sen mediar provocación

Segundo se observa noutro vídeo ao que tivo acceso este diario, cuxa fonte pediu que non sexa difundido, a policía reduciunos tamén con violencia sen que pareza mediar provocación ningunha.

Os detidos son seis mozos e tres mozas, todos na contorna dos 20 anos e sen antecedentes penais, segundo asegura a letrada que exerce o seu defensa, Carme Rodríguez Rey, avogada do Sindicato de Traballadoras e Traballadores do Ensino de Galicia (STEG), unha das organizacións que apoiou a manifestación.

Rodríguez asegura que todos están acusados dun delito desordes públicos, castigado con penas de tres meses a un ano de prisión e dun a seis anos no seu grao agravado; e varios deles con outro de atentado á autoridade, penado con entre seis e doce meses e dun a catro anos na súa versión agravada.

Segundo puido saber Luzes-Público, os detidos permaneceron ata nove horas nos calabozos da comisaria, esposados en moitos momentos, mesmo, en varios casos, cando solicitaron ser examinados por un médico e foron trasladados ao momento de atención continuada e ás Urxencias do hospital Clínico para ser atendidos das súas feridas.

Contusións, feridas, ansiedade e beizos partidos

Entre elas figuran contusións na cabeza, as pernas, os brazos e o tórax;, feridas abertas en perna e cabeza; beizos partidos e hematomas nos ollos, as costas e outras partes do corpo, así como crise de ansiedade e dor articular.

Os detidos e o seu defensa aseguran ademais que a polo menos sete deles non se lles realizaron os pertinentes partes de lesións, senón meras exploracións parciais mentres permanecían esposados, sen poder sequera sinalar onde lles doía, coa roupa posta e sempre en presenza dos axentes que os custodiaban, que interactuaban cos facultativos para indicarlles a súa opinión sobre o sucedido.

Luzes-Público dirixiuse á Delegación do Goberno en Galicia, que dirixe Pedro Blanco Lobeiras, para obter a súa versión dos feitos e unha valoración das denuncias dos afectados sobre a inoportunidade das cargas, a súa extremada dureza e a indefensión que din sufrir en comisaría e nos centros médicos. Á hora na que se terminou de redactar este artigo non houbo resposta.

Por esa razón, este diario tampouco puido contrastar as informacións de varias fontes que aseguran que un dos policías implicados ten un brazo roto. Segundo a defensa dos detidos, que foron postos en liberdade, ningún deles foi acusado do delito de lesións.