Alemaña e España reiteran a súa intención de desenvolver o gasoduto durante o cume bilateral celebrado na Coruña.

A Coruña.- Alemaña e España renovaron este mércores a presión que exercen sobre Francia para lograr que ese país acepte o proxecto Midcat, o gasoduto que permitiría transportar hidróxeno e gas desde España ata Centroeuropa para rebaixar así a dependencia do gas ruso que padecen os socios europeos desa rexión.

Ambos os países entenden que, diante o cambio xeopolítico que supuxo a invasión da Ucraína, resulta esencial incrementar as interconexións enerxéticas para evitar así as ameazas e aos problemas de subministración aos que Moscova somete á Unión.

Durante o cume hispanoalemán celebrada na Coruña, os gobernos de Pedro Sánchez e de Olaf Scholz asinaron unha declaración política na que aseguran coincidir na necesidade de garantir unha subministración «segura, alcanzable e sostible en toda a UE».

Para iso, afirman, é «fundamental incrementar as interconexións enerxéticas» cun «deseño a proba de futuro do mercado eléctrico europeo».

A declaración non cita expresamente o Midcat, aínda que si o fai o plan de acción conxunto que a acompaña e que recolle accións concretas de cooperación entre España e Alemaña.

«A construción dun gasoduto preparado para o hidróxeno (…) a través dos Pireneos, para estar operativo en 2025, é de suma importancia para lograr un sistema interno verdadeiramente robusto no mercado da enerxía da UE, para acelerar a transición verde e para reforzar a autonomía estratéxica da UE», sinala o documento.

«As conversacións necesarias deben incluír a todas as partes implicadas, así como á Comisión Europea», engade o plan.

O cume da Coruña iniciouse con case unha hora de atraso debido en boa parte ao mal tempo, que complicou a chegada da delegación alemá ao aeroporto de Santiago, mentres que a española aterraba no aeródromo coruñés de Alvedro.

Baixo unha fina choiva e algo de néboa na contorna do porto da Coruña, onde está situado o recinto onde se celebrou o encontro, Sánchez recibiu a Scholz e xuntos foron saudando aos quince ministros e ministras que participaron no encontro.

A mención expresa ao Midcat supón un novo elemento de presión sobre o presidente francés, Emmanuel Macron, quen se mostrou contrario ao gasoduto e defendeu a capacidade de Francia para fornecer enerxía a Europa grazas á fortaleza da súa rede de centrais nucleares.

No transfondo de posición está o medo á competencia que o gasoduto podería supoñer no futuro para as capacidades exportadoras de enerxía de Francia, que prefire importar de España enerxías renovables para desenvolver no seu propio territorio proxectos de produción de hidróxeno.

«Necesitamos máis interconexións», asegurou Scholz na rolda de prensa que pechou o cume, para expresar o seu defensa explícita do gasoduto e asgurando que se desenvolvería «en cooperación amigable con Francia». «Non cremos que houbese unha negativa rotunda ao proxecto», dixo.

Pola súa banda, Pedro Sánchez lembrou que a capacidade de interconexión actual entre a península ibérica e o resto da UE é moi baixa -«menos do 5%, máis preto do 3% que do 4%», dixo-, e que iso impide a España aproveitar «toda a capacidade de regasificación» da que dispón, e a Europa, beneficiarse dela». Mellorar as interconexións, a xuízo do presidente español, «é o único modo un mercado europeo integrado».

Na declaración política do cume, España e Alemaña tamén se comprometeron a protexer o nivel de vida dos seus cidadáns e a desenvolver e aplicar as medidas necesarias para que empresas e fogares poidan enfrontar a inflación e a crise enerxética de forma que «ninguén quede atrás».

«Ambos os gobernos puxeron o foco en tres aspectos básicos, comprometéndose a protexer a situación económica dos seus cidadáns, nun contexto en que a existencia dunha guerra no continente europeo pon en risco o seu nivel de vida e a súa seguridade enerxética, a garantir a súa seguridade e defensa, así como a fomentar que (…) estean en condicións de mellorar o seu futuro», di o texto final do cume.