A Coruña.- Unidas Podemos pediu no Congreso dos Deputados que o Tribunal de Contas investigue os preto de 140 contratos públicos adxudicados ao Grupo Eulen pola Xunta desde o ano 2009, cando Alberto Núñez Feijóo accedeu á presidencia de Galicia.
A irmá do novo presidente do PP, Micaela Núñez Feijóo, foi directora rexional para a comunidade desa empresa ata ao 2016, cando foi ascendida a directora para todo o noroeste do Estado, xusto despois de que a Administración galega outorgase no 2015 a Eulen o récord de adxudicacións na comunidade, con contratos por máis de 6,2 millóns de euros, tal e como contou Luzes-Público.
En total, entre o 2009 e o 2021, as empresas do grupo recibiron da Xunta adxudicacións por máis de 37 millóns de euros.
O deputado Antón Gómez-Reino, do grupo confederal de Unidas Podemos-En Común Podem-Galicia en Común, presentou unha petición na mesa da Comisión Mixta para as Relacións co Tribunal de Contas na que alerta «de indicios sobre a existencia de irregularidades nestes expedientes», polo que considera necesario que o Tribunal de Contas os examine.
Segundo afirma Gómez-Reino na súa petición, existen indicios de que Eulen obtivo «trato de favor con respecto aos seus competidores en numerosas licitacións públicas» por parte da Xunta e das fundacións, empresas públicas e entidades instrumentais dependentes, como o Servizo Galego de Saúde (Sergas), a Sociedade Galega de Medio Ambiente (Sogama), Augas de Galicia, a Fundación Deporte Galego, a Fundación Semana Verde de Silleda, a Fundación Cidade da Cultura e a Corporación de Radio e Televisión de Galicia, entre outras.
En moitos, lembra o deputado, a empresa obtivo contratas sen ser a proposta máis vantaxosa desde o punto de vista técnico nin económico e «mesmo sendo a que propoñía un prezo máis elevado nalgúns casos» e «gañando procedementos por exclusión das súas competidoras» sen que se xustificasen esas decisións. Tamén indica que existen indicios de que a firma da que Micaela Núñez Feijóo é directiva puido ter información privilexiada cando gañaba concursos con ofertas «axustadas ao prezo máximo de licitación» precisamente cando era a única que se presentaba a elas.
O deputado tamén apunta que na adxudicación de varios grandes contratos para servizos prestados en distintos lugares incumpríuse a Lei de Contratos Públicos que obrigaba a dividirlos en lotes, e que Eulen mesmo gañou concursos nos que a súa oferta fora declarada baixa temeraria, é dicir cunha oferta económica tan baixa que podería significar que non podería cumprila polo prezo estipulado ou facelo reducindo os salarios do seu persoal.
Así mesmo, destaca a coincidencia entre varias adxudicacións e os cesamentos e ascensos de altos cargos nos organismos adxudicatarios.
A semana pasada, o Bloque Nacionalista Galego (BNG) reclamou ao Parlamento de Galicia que instase ao Consello de Contas a investigar os contratos da Xunta con Eulen, pero a proposta, apoiada polo PSOE, foi tombada pola maioría do Partido Popular.
Segundo fontes do grupo parlamentario de Unidas Podemos, non existe conflito de competencias entre o Consello de Contas e o Tribunal de Contas nin impedimento legal algún para que este investigue a actividade dunha administración autonómica. Ao contrario, xa que a lei lle encomenda con carácter xeral «a fiscalización externa, permanente e consuntiva da actividade económica do sector público», incluídas as comunidades autónomas, e «o axuizamento da responsabilidade contable de quen teña ao seu cargo o manexo de caudais ou efectos públicos».
As mesmas fontes engadiron que existe xurisprudencia do Tribunal Constitucional respecto diso que confirma esa función do Tribunal de Contas, e que esperan que a proposta salga adiante co apoio da maioría que apoia ao Goberno. Nese sentido, lembran que o PSOE acaba de presentar outra similar para que ese organismo investigue as contas da Deputación de Ourense, que preside Manuel Baltar, do PP.
