Este artigo tamén está dispoñible en: Castelán
Galicia adoita estar ausente case por completo no debate político nacional durante todo o ano. Fai falta un desastre natural, como o dos incendios, ou unha neglixencia, como a do Marisquiño, para que partidos e medios de comunicación reparen na esquina noroeste da península.
Iso si, un día ao ano dáselles por abrir o curso político en Galicia. Rajoy facíao todos os anos, tiña certo sentido pola súa orixe e porque estaba en Pontevedra de vacacións, aínda que de Galicia apenas dicía algo máis que os eloxios de rigor a Feijóo.
A apertura do curso de Rajoy era xa case unha tradición no castelo de Soutomaior, ata que con bo criterio a presidenta da Diputación, Carmela Silva, decidiu que o castelo era de todos os pontevedreses e non se debía usar para promocionar ao partido da gaivota.
Agora faise en Cotobade e Pablo Casado quixo agradecer o apoio de Feijóo presidindo o acto, e de paso reuniuse con Rajoy a quen non debe ter moi contento porque a súa liña política é case unha emenda á totalidade da do anterior presidente popular.
Veremos cando os máximos dirixentes do PP e do PSOE volven falar de Galicia. Non é moito mellor o panorama no grupo de En Marea
Casado encargoulle a Feijóo que coordine a conferencia nacional do PP de decembro e o presidente galego deixou o único titular político da cita, pedíndolle ao novo líder popular un PP máis centrado. E é que a estrea de Casado e os seus mozos este verán foi un festival de dereita dura na súa encarnizada batalla con Rivera.
Os socialistas quixeron tamén este ano contraprogramar o PP e trouxéronse a Santiago á vicepresidenta Carmen Calvo quen tamén falou moito máis de Cataluña que de Galicia. 4 fotos no Obradoiro e a Madrid.
Un día é un día porque veremos cando os máximos dirixentes do PP e do PSOE volven falar de Galicia. Non é moito mellor o panorama no grupo de En Marea. Os seus votos son tan decisivos para a continuidade de Pedro Sánchez como os do PNV, Esquerra ou o PdeCat, pero nas conversacións de Sánchez e Igrexas para os orzamentos non se dixo nin unha palabra de Galicia, polo menos que se saiba e polo menos de momento.
Os deputados de En Marea teñen que facer valer a súa posición na Cámara porque é evidente que, se fose o BNG o que tivese o mesmo poder no Congreso, polo menos o Goberno socialista tería que falar galego na intimidade moito máis a miúdo.
Este artigo tamén está dispoñible en: Castelán
