A Coruña.- Arsenio Iglesias, o futbolista e adestrador que converteu ao Deportivo nunha lenda do fútbol patrio a finais do século pasado, faleceu este venres aos 92 anos. Natural de Arteixo, Iglesias era o menor de nove irmáns dunha modesta familia de agricultores. Debutou en primeira división en 1952, con vinte e un anos, nun partido contra o Barcelona no que lle marcou un gol a Ramallets. Aínda que el nunca o confirmou, as crónicas da época contan que lle pediu perdón por iso ao mítico gardameta catalán.
O seu carácter estaba tamén caracterizado pola modestia, a humildade e un uso preciso da retranca, baixo a que escondía moitos máis coñecementos dos que expresaba en público. En Galicia coñecíaselle como O bruxo, quizá pola súa capacidade para aliarse coas meigas e para obrar certa sorte de maxia nos equipos nos que xogou e aos que adestrou. Tamén para enmeigar á sala de prensa con respostas ás veces insondables coas que se burlaba sibilinamente dos lugares comúns e a dialéctica aburrida e repetitiva do xornalismo futboleiro.
Nunha ocasión, alertou a un plumilla do tráxico para o seu equipo de recibir «un gol psicodélico», por psicolóxico, deses que che marcan nos últimos minutos da primeira parte dun partido. Noutra, un reporteiro madrileño preguntoulle que libros lía, en plan emboscada para que sacase á luz a incultura que lle presumía. El contestou que estaba enfrascado coas Obras Completas de Rodolfo Lamas. En realidade, as obras de Lamas eran as moitas que executou en Galicia, como un dos constructores máis prolíficos nos anos 60 e 70 do século pasado.
O penalti de Djukic
Co Bruxo dirixindo a un equipo armado cun orzamento tamén modesto e baixo a presidencia de Augusto César Lendoiro, con quen acabou enfrontado, o Deportivo converteuse en Super Dépor a finais dos oitenta e principios dos noventa. Plantoulles cara aos grandes, especialmente ao Real Madrid e, sobre todo, ao Barcelona de Johan Cruyff, fronte ao que perdeu unha dramática Liga tras o penalti errado no estadio de Riazor polo serbio Miroslav Djukic, un dos xogadores máis queridos pola afección, nos minutos finais do último partido da tempada 93/94 contra o Valencia. Foi hai case, case 29 anos xustos, o 14 de maio de 1994.
Arsenio gañou unha Copa do Rey e dous subcampeonatos de Liga, e levou ao Deportivo ás competicións europeas por primeira vez na súa historia. O seu traballo sentou as bases para que o equipo gañase despois a liga en 2000 e se acomodase durante uns anos como un habitual da liga de Campións da UEFA, onde chegou a golear ao Milán e onde alcanzou mesmo unhas semifinais que perdeu contra o Porto de Mourinho. En 1996, Iglesias fichou polo Real Madrid para substituír no banco a Vicente del Bosque, que á súa vez relevara a Jorge Valdano, pero non logrou dar marcha atrás na pésima marcha do equipo, que fixo a súa peor tempada daqueles anos.
A figura de Arsenio Iglesias transcende na Coruña a súa relevancia como xogador e adestrador, porque desencadeou na cidade un sentimento colectivo de unidade, autoestima e ilusión que durou varios anos e que converteu ao equipo e o seu xogo –«orde e talento», era o lema do Bruxo– nun fenómeno sociolóxico máis aló mesmo de Pedrafita e O Padornelo. O equipo que armou foi unha combinación de xogadores que se asemellaban a el, impecables tecnicamente pero calados, traballadores e, na súa maioría, igual de tímidos e humildes: os irmáns Fran e José Ramón González, os brasileiros Bebeto e Mauro Silva, o propio Djukic… O club encandeou dentro e fóra de Galicia, e moi raro tiña que ser calquera bo afeccionado daquela época que non tivese ao Super Dépor, como mínimo, como o seu segundo club favorito. Foi o que o escritor e xornalista Manuel Rivas definiu como a revolución do fútbol atlántico.
Meigallo branquiazul
O Deportivo vive hoxe moi afastado daqueles días de gloria. Descendeu a segunda división en 2015 e a terceira en 2020. Pero aquel Súper Dépor deixou un sinal tan profundo que Riazor, cunhas 28.000 localidades, segue enchéndose décadas despois cada quince días nunha urbe que conta con menos de 250.000 habitantes. A morte de Arsenio sorprendeu á Coruña en vésperas dun partido clave contra o Alcorcón, líder da categoría. O Dépor ocupa a cuarta posición e o encontro é vital para as súas aspiracións de saír dunha vez do pozo e recuperar a maxia perdida . Seguro que gañan. Desde hai unhas horas hai un meigallo branquiazul sobrevoando a cidade.
