A Coruña.- Varias asociacións ecoloxistas reclamaron á Xunta que impida a celebración de cinco campionatos de caza de raposos que se celebrarán este mesmo mes, unha vez terminada a tempada cinexética desa especie e sen contar, por tanto, con datos confirmados sobre a situación da especie.

Ademais, esas asociacións advirten de que nin a Xunta nin as federacións de caza publicitaron nin a data nin os lugares onde se celebrarán eses eventos, o que, ao seu xuízo , tamén pon en perigo a vida dos veciños dos cotos e de quen acuda ao monte eses días.

Segundo a resolución do Goberno de Alfonso Rueda que determina anualmente as épocas hábiles de caza, a tempada para abater raposos debe terminar o 6 de xaneiro. Pero a mesma norma permite autorizar batidas tamén no período inhábil, e os cazadores adoitan aproveitalo para pechar o período con eses campionatos.

Así, xusto ao día seguinte de que se termine a tempada, o 7 de xaneiro, celebraranse dous campionatos provinciais na Coruña e Ourense. O 14 de xaneiro haberá outros dous, en Lugo e Pontevedra; e o 21 de xaneiro, tres: a copa de Lugo, o campionato de Galicia e a copa de España.

«Non se pode fomentar a caza como matanza absoluta sen ningún criterio científico», asegura Rubén Pérez Sueiras, portavoz da Fundación Franz Weber, quen subliña ademais que a situación se agrava porque un campionato «gáñao quen mata máis». «Van saír ao monte para ver que queda vivo e a exterminalo», sostén.

O portavoz engade o perigo que supón «encher un monte con cen persoas armadas disparando a todo o que se move sen advertir antes á poboación».

A Fundación Weber reclamou á Xunta as cifras de raposos abatidos na última tempada, pero non lla facilitaron. Calculan que son unha media duns 12.000 ao ano, unha cifra que coincide coa que facilita Ecoloxistas en Acción, que calcula que entre 2014 e 2020 se cazaron 75.000 deses animais.

«A eliminación masiva dun depredador ten consecuencias nefastas na rede trófica e representa o aumento exponencial a curto prazo de especies que poden causar superpoblaciones descontroladas», advirte esa organización.

«Estas batidas non están baseadas en ningún estudo de estima poboacional de raposos na zona, e un campionato nunca pode ser unha forma de control. Non está ben disfrazar de xestión do medio natural o que é lecer e negocio dunha minoría», engade.

En Galicia, sobre unha poboación de 2,6 millóns de persoas, hai uns 20.000 cazadores federados e unhas 35.000 licenzas.

Os gobernos do PP en Galicia sempre defenderon a caza como modo de control das poboacións de diversas especies. A actual conselleira de Medio Ambiente, Ángeles Vázquez, declárase partidaria desa actividade e en varias ocasións asegurou que resulta fundamental para conservación do medio natural na comunidade.

Ademais, a Xunta flexibilizou progresivamente as normas que a regulan, mesmo para fomentala. A última vez o pasado novembro, cunha emenda á lei de acompañamento dos Orzamentos Xerais da Xunta para 2023, para modificar a lei de caza de Galicia ofrecer gratis a licenza aos maiores de 65 anos.

Na mesma norma incluíuse outra emenda para eliminar a obrigatoriedade de que os asexos –a modalidade na que varios cazadores esperan ás súas pezas– sexan vixiados por persoal de seguridade, lembra Sueiras.

Os ecoloxistas cren que a Xunta utiliza esas concesións ao lobby da caza como reclamo en ano electoral, pero que as oculta de maneira intencionada á opinión pública, posicionada, segundo asegura Rubén Pérez Sueiras, contra a caza en xeral e moito máis contra campionatos como os sete que se celebran este mes.