As Anpas de Pontevedra comunicaron que o protocolo contra o COVID-19 da Xunta é «inviable» e por iso decidiron suspender os servizos para o período 2020-21.

Desde que a Xunta de Galicia fixo público o protocolo contra o covid-19 nas aulas as protestas no ámbito educativo non cesan. Esta vez foi a Federación Provincial de Anpas dos centros públicos de Pontevedra (FANPA) e a súa decisión de suspender os servizos de comedor e Plan Madruga, os cales dirixe, por considerar «inviables» as condicións da Consellería de Educación para afrontar o próximo curso.

As actividades extraescolares tamén sairán mal paradas. A proposta do Goberno de Alberto Núñez Feijóo significa que nos comedores escolares se reduza o 80% a capacidade de alumnado, de maneira que do 20% restante o voluntariado tería que elixir quen poden optar ás comidas. Como consecuencia, o incremento do gasto subiría «como mínimo un 100%» para as familias, segundo informou a Fanpa de Pontevedra. O presidente da federación, Rogelio Carballo, explica a Luzes que isto crearía un «conflito social» e que os comedores están feitos «para todos».

[Puedes seguir leyendo este artículo en castellano aquí]

A responsabilidade sanitaria, tamén nas clases e demais instalacións dos colexios, recae no centro, de maneira que as persoas encargadas da calidade alimentaria e dos posibles accidentes son as responsables dos labores de desinfección. Esta desorganización contrasta con algunhas medidas do Executivo autonómico como os «grupos burbulla». Redúcese a cociente de alumnos por clase a 25 como máximo, que poden interactuar entre si e evitarase á vez contactos co resto do centro. Con todo, a mesma cadea de hixiene rómpese no uso do transporte escolar e a ausencia de medidas de seguridade pautadas.

Así as cousas, o curso 2020-2021 para os alumnos de infantil será aínda máis anormal do que xa ía marcar o coronavirus. Non se poderán desenvolver comedores xa que a organización integral é das Anpas e as familias terán que buscar outras maneiras para conciliar. Os centros de ensino afectados son máis de 30 en Vigo, 18 de Pontevedra e 5 de Marín. Desde FANPA comprométense a levar a cabo os comedores se a Consellería «busca mecanismos» para solucionar as dificultades. Do contrario, reclamarán todos os danos e prexuízos «ante a xustiza en forma de demanda colectiva», declarou Carballo.

O presidente da Xunta, Alberto Núñez Feijóo, opinou sobre a noticia. «Lamentamos esa ameaza por parte desas Anpas, pero non lle oculto a sorpresa», comunicou o barón galego. Cando o Goberno publicou o documento, catro días despois das eleccións autonómicas, os sindicatos e colexios públicos manifestaron o seu malestar e o descoñecemento de Educación. Abandonaron a mesa sectorial por non ter en conta ás familias e por delegar toda a responsabilidade nos centros -mesmo no alumnado- sen dotación orzamentaria nin de persoal. Pola súa banda, concluíron que, se a Consellería non modifica o documento, pedirán que non se inicien as clases en setembro.

«O curso escolar ten que empezar e non vai quedar pola administración educativa», engadiu Feijóo. Por iso, pediu que estas asociacións reflexionen e convidoulles a darse un «baño de realismo» pola situación sanitaria. Preguntado sobre estas afirmacións, o presidente de FANPA sostén que a protesta non leva intención política. «Non é unha cuestión de atacar á Consellería porque si. Feijóo debería saber que non somos operadores económicos, non somos unha empresa, somos unha asociación sen ánimo de lucro».

Este venres as Fanpa Pontevedra e a Federación Olívica de Asociacións de Nais e Pais de Alumnos de Vigo e Comarca (Foanpas) pediron diálogo á Consellería de Educación. Explicaron que se renovará o servizo se se dan tres condicións. A primeira, unha atención a todo o alumnado. O que implica o uso de máis espazos tanto para o comedor como para os madrugadores e máis monitores e coidadores para supervisar. A segunda, radica en que os custos derivados sexan asumidos polo Goberno autonómico, como do material sanitario e de limpeza. A última, unha colaboración integral da Consellería. O diálogo ten que darse canto antes, xa que o 10 de agosto ábrese a matrícula para os comedores en Pontevedra.

---

Este artigo publicouse orixinariamente en castelán en Público como parte dun acordo de colaboración con este periódico. Aquí podes atopar máis artigos de Público en Luzes.