A Coruña.- O deputado do BNG no Congreso, Néstor Rego, presentou varias iniciativas instando o Goberno a que explique todas as vías de financiamento ás que a multinacional portuguesa Altri solicitou acollerse para sufragar a macrofábrica de celulosa que pretende construír na localidade lucense de Palas de Rei.

En concreto, Rego quere saber se Altri, asociada en Galicia a través de varias fórmulas mercantís a empresas como Greenalia, Abanca, Naturgy e Reganosa, pediu fondos públicos no marco dos Proxectos Importantes de Interese Común Europeo (Piice). Trátase dunha iniciativa de 14 estados da UE, entre eles España, apoiada pola Comisión Europea e que permitirá a eses gobernos, previa avaliación de Bruxelas, conceder 8.700 millóns de euros de axudas públicas a proxectos de microelectrónica, tecnoloxías das comunicacións e métodos de fabricación eficientes desde o punto de vista enerxético e que aforren recursos.

Altri xa solicitou diñeiro público da UE para a súa macrocelulosa pedindo ao Executivo que a declare Proxecto Estratéxico para a Recuperación e Transformación Económica (Perte) de descarbonización industrial, que ten un importe máximo de 30 millóns de euros por iniciativa. A multinacional pretende obter subvencións a fondo perdido de ata 250 millóns, entre o 20% e o 25% do que asegura investirá en Palas. O pasado 19 de marzo, o BNG advertiu ao ministro de Industria, Jordi Hereu, que se reformulará o seu apoio ao Goberno se este aproba esa petición.

«Non causar un dano significativo»

No caso da liña de axudas Piice, Rego, lembra que para que un proxecto poida ser considerado Piice, debe cumprir co principio de «non causar un dano significativo», e alerta de que que a fábrica de celulosa de Altri non encaixa nesta normativa xa que a súa declaración de impacto ambiental, aprobada en marzo pola Xunta de Galicia, contén «omisións graves» e un «enfoque intencionadamente limitado» sobre os seus efectos ambientais.

«Non podemos permitir que un proxecto con este nivel de impacto ecolóxico e social acceda a financiamento público, especialmente cando non se garante que cumpra coas esixencias ambientais da UE», afirma o deputado nacionalista. «O Goberno debe esclarecer xa se está disposto a negar apoio a Altri xa sexa pola vía das axudas directas ou polas dunha convocatoria competitiva no marco dos Piice», conclúe.

O BNG tamén informa de que impulsou as súas iniciativas no Congreso a pedimento da Plataforma Ulloa Viva, que leva meses alertando das graves consecuencias ambientais e socioeconómicas que este proxecto podería ter para a comarca da Ulloa. Ademais, a Plataforma en Defensa da Ría de Arousa (Pedra) tamén se mobilizou contra o proxecto alertando de que as augas do río Ulla ás que Altri verterá os residuos do seu proceso produtivo acabarán cos bancos marisqueiros do estuario, onde desemboca o río, dos que viven miles de familias dedicadas á pesca e o marisqueo artesanais.

Eurocámara

Doutra banda, a eurodeputada da formación nacionalista, Ana Miranda, pediu onte en Estrasburgo (Francia) á Comisión Europea que avalíe «con urxencia» o impacto da celulosa de Altri na ría de Arousa.

Durante o debate que tivo lugar este xoves na Eurocámara sobre o pacto europeo dos océanos, Miranda explicou que a fábrica de celulosa verterá a través do Ulla millóns de litros de auga contaminada ao mar, poñendo en perigo a actividade produtiva da ría.