Santiago.-  A militancia do Bloque Nacionalista Galego (BNG) renovou este domingo o liderado de Ana Pontón á fronte da formación nacionalista, e apoiou de maneira contundente a estratexia que mantén desde fai oito anos para alargar a base socioelectoral do partido, e erosionar así o rochoso poder do Partido Popular na comunidade.

Pontón gañou con máis do 84% dos votos e 16 dos 20 representantes da executiva que se elixían na XVIII Asemblea do Bloque –son 21 membros coa portavoz nacional das mocidades nacionalistas– celebrada en Santiago, na que participaron máis 2.500 persoas. «Hai que acabar co réxime absolutista do PP, somos a única alternativa real ao PP en Galicia», dixo.

En 2016, o ano no que a actual portavoz nacional se fixo cargo da formación, o grupo parlamentario autonómico do BNG no Parlamento de Galicia reducíase a seis deputadas. Hoxe, o Bloque é a segunda forza na Cámara autonómica, a enorme distancia do PSOE: 25 escanos a nove e case 260.000 votos de diferenza nas últimas autonómicas de febreiro pasado, é dicir máis do 17% dos sufraxios, o que converte a Pontón na referencia central para disputarlle a hexemonía na Xunta ao Partido Popular.

«Ese obxectivo require un proceso previo de acumulación: máis organización, máis traballo social, máis poder municipal… Temos tres anos para conseguilo», engadiu, en referencia ás eleccións autonómicas previstas para o inverno de 2028.

Maiorías sociais e intereses de país

Boa parte do crecemento que experimentou o BNG baixo os mandatos de Ana Pontón débese ao redeseño de imaxe, estrutura de traballo e xestión comunicativa que ela e o seu equipo construíron para o partido, sobre a idea de que é a única formación que representa de verdade ás maiorías sociais e os valores feministas; a única que defende sen ataduras os intereses de Galicia, e a única que se aparece como alternativa real ao bipartidismo, enfrontándose ao PP en Santiago e ao PSOE en Madrid cando considera que eses intereses están en dúbida.

Ese discurso, que combina un declarado ADN soberanista e de esquerdas co perfil moderado e oscilante en torno ao centro político co que se identifica unha porcentaxe maioritaria da sociedade galega, empezou a calar nese arco do electorado que abarca desde a socialdemocracia ata o galeguismo conservador, e do que ata o de agora o PP soubo sacar unha e outra vez xenerosos réditos en case todos os procesos electorais.

A propia figura de Pontón como líder da oposición desde as de 2020, nun papel exercido desde a serenidade e o diálogo pero con firmeza diante a apisoadora das maiorías absolutas de Feijóo, primeiro e de Alfonso Rueda, despois, tamén foi empapando ao electorado, que sitúa á portavoz nacional do Bloque como unha das políticas máis coñecidas e mellor valoradas de Galicia mesmo entre os simpatizantes do resto de partidos.

Noa Presas e Gustavo Barcia

Na executiva de Pontón entraron tamén os líderes das dúas candidaturas alternativas que se presentaron ao congreso: a deputada autonómica Noa Presas, de En Movemento, que obtivo un 12,3% de apoios da asemblea e tres membros na dirección, e o portavoz local en Mos (Pontevedra), Gustavo Barcia, da corrente interna Alicerce, que co 3,5% obtivo o seu propio asento.

Durante os seus discursos diante a asemblea e os debates dos relatorios, pechados ao público e á prensa, ambos avogaron pola cooperación e o apoio mutuo en torno ao proxecto político do Bloque, segundo informaron varios dos asistentes aos mesmo.

Ao termo do congreso, Pontón chamou tamén á unidade para «facer realidade o soño» de que o BNG chegue a gobernar Galicia dentro de tres anos: «Esta é unha carreira de fondo. Os cambios ás veces tardan en chegar máis do que nos gustaría. Pero somos a esperanza desa maioría social que soña unha Galicia posible. Non hai nada máis revolucionario que chegar ao Goberno».

A nova executiva do BNG

Estos son os membros da nova executiva do Consello Nacional do BNG:

Portavoz Nacional: Ana Pontón

Goretti Sanmartín,

Lucía López Sobrado

Olalla Rodil

Néstor Rego

Luís Bará

Carme da Silva

Lois Pérez Castrillo

Xavier Campos

Ana Miranda

Xosé Manuel Puga

Bieito Lobeira

Montse Prado

Eva Vilaverde

Xabier Pérez Igrexas

Olalla Ledo

Noa Presas

David Soto

Gustavo Barcia

Marta Gómez